La vocera de Vox na Xunta Xeneral y un conceyal dicen que la política llingüística del Principáu «impón l'asturianu» y usase «dándo'l llombu a lo que quier la mayoría»
13 ene 2026 . Actualizado a las 14:52 h.La vocera de Vox na Xunta Xeneral, Carolina López, y el conceyal en Tinéu, Sergio Martínez, criticaron esti llunes la imposición de la toponimia n'asturianu nel conceyu de Tinéu. Dambos señalaron que la denominación n'asturianu apaez agora en tolos cartelos, na alministración y nos medios, y la forma en castellán yá nun s'utiliza.
Según detalló Martínez, la cuestión remóntase a 2016, cuando s'aprobó'l cambéu de topónimos, primeramente contemplando'l caltenimientu de dambes formes --en castellán y n'asturianu--. Según el conceyal, «dos meses dempués vuélvese a someter a plenu una rectificación na que s'omite esa parte de convivencia de dambes formes y, de magar, solo caltiénse la forma en llingua», falando del asturianu.
Martínez señaló que, a la so manera de ver, esto xenera «trestornos nel día ente día, yá que los vecinos manifiesten que nunca fueron vecinos de Tinéu o d'otros pueblos con nomes que son dafechu ayenos a la realidá».
El conceyal anunció que Vox va presentar una moción nel próximu plenu de Tinéu pa que'l Conceyu se pronuncie sobre la toponimia y solicitó por escritu l'espediente completu nel que s'el alcuerdu plenariu, coles mires d'esquizar toles víes que s'abren pa recuperar lo que ye'l nome tradicional y verdaderu del Conceyu de Tinéu.
Pela so parte, la vocera de Vox, Carolina López, aseguró que la toponimia ye «una baza más» del Gobiernu autonómicu pa «imponer a una mayoría lo qu'inventó una minoría col presupuestu públicu». Al so xuiciu, la política llingüística del Principáu «impón l'asturianu» y usase «dándo'l llombu a lo que quier la mayoría».
Pa la vocera, l'asturianu ye «un inventu» que l'Executivu «obliga a financiar con dineru públicu». «Y, enriba, oblíguennos a toos a aprendelo», añedió.
Nesti marcu, López comentó que Vox solicitó al gobiernu autonómicu que detalle «cada céntimu del presupuestu públicu que se destina a la llingua» y que, según los sos propios cálculos, el gastu añal supera los 55 millones d'euros, «incluyendo subvenciones a conceyos, empreses privaes, sueldos de profesores d'asturianu, materiales didácticos, traducciones y duplicidaes alministratives».