La Comisión Nacional del Eclís felicita al Conceyu de Xixón pola so planificación del Eclís 2026
AGORA
Destacóse, nesti casu, que'l Consistoriu ta llevando a cabu dende l'entamu unes escelentes iniciatives de preparación que van poder sirvir d'exemplu a otres ciudaes
21 ene 2026 . Actualizado a las 12:29 h.El Conceyu de Xixón foi reconocíu pola Comisión Nacional del Eclís, dependiente del Ministeriu de Tresportes y Movilidá Sostenible del Gobiernu d'España, poles xeres que realizó de cara a los actos alredor del eclís de sol total, que va poder vese'l próximu 12 d'agostu, especialmente nel conceyu xixonés. Destacóse, nesti casu, que'l Consistoriu ta llevando a cabu dende l'entamu unes escelentes iniciatives de preparación que van poder sirvir d'exemplu a otres ciudaes que s'atopen na franxa de la totalidá del Eclís 2026.
Dende l'organismu estatal felicitóse a la Conceyalía de Relaciones Institucionales y Mocedá pola so planificación y pol trabayu desenvueltu hasta'l momentu. Coles mesmes, señalóse que'l pasáu 17 d'avientu celebróse una nueva xunta de trabayu na que participaron les árees de Turismu, Educación, Divertia, Seguridá Ciudadana y Comunicación, amás de representantes del ICTEA, de l'Asociación Astronómica OMEGA y del Colexu d'Ópticos Optometristas d'Asturies.
El presidente de la Comisión Nacional del Eclís, Ramón Bachiller, quien tamién ye Secretariu de la Comisión Nacional d'Astronomía y Director del Observatoriu Astronómicu Nacional, valoró l'actitú tan proactiva del Conceyu de Xixón y la so disposición pa collaborar con tolos actores locales que tán implicaos, quiera que non, na observación del eclís, siempre teniendo en cuenta les midíes de seguridá pertinentes. Recordóse, amás, dalgunes de les actividaes realizaes yá con relación al eclís, como fueron, en marzu pasáu, unes xornaes divulgatives sol títulu 'Sol y eclises'.
Próxima Xunta
Per otra parte, avanzóse que'l próximu 12 febreru la Conceyalía de Relaciones Institucionales va entamar una nueva xunta na que se va avanzar el trabayu de la coordinación del eclís y na que van participar les árees de Turismu, Divertia, Educación, Seguridá Ciudadana, Educación, amás del ICTEA, OMEGA y el Colexu d'Ópticos Optometristes d'Asturies.