Más de 10.000 estudiantes preuniversitarios van conocer la ufierta académica de la Universidá d'Uviéu
AGORA
Se va celebrar del 9 al 12 de febreru nel Palacio d'Esposiciones y Congresos Ciudá d'Uviéu
05 feb 2026 . Actualizado a las 12:47 h.Les Xornaes d'Orientación Universitaria de la Universidá d'Uviéu siguen creciendo y prevén la participación de más de 10.000 estudiantes na presente edición, que se va celebrar del 9 al 12 de febreru nel Palacio d'Esposiciones y Congresos Ciudá d'Uviéu. Según informa la institución académica, nesta edición aumenta tamién el númberu de centros educativos inscritos, un total de 126 procedentes de tola rexón. En concreto, l'alumnáu preuniversitariu inscritu xube a 9.480, a los que se van sumase les persones qu'alleguen el miércoles 11 de febreru n'horariu vespertín, cuando l'accesu ta abiertu al públicu xeneral.
Estes xornaes, entamaes pol Vicerrectorau d'Estudiantes y Empleabilidá de la Universidá d'Uviéu en collaboración cola Conseyería d'Educación del Principáu d'Asturies y el Conceyu d'Uviéu, diríxense al alumnáu de Bachilleratu, de 4 cursu d'Educación Secundaria Obligatoria (ESO) y de Ciclos Formativos de Grau Cimeru (CFGS).
L'oxetivu ye informa-yos sobre la ufierta formativa d'estudios universitarios, los procedimientos d'accesu y almisión a la universidá, lo mesmo que d'otros aspectos relevantes de la vida académica. El vicerrector d'Estudiantes y Empleabilidá, Alfonso López Muñiz, indicó que l'H.ou son una oportunidá clave pa que l'estudiantáu preuniversitario conoza de primer mano l'amplia y diversa ufierta académica de la Universidá d'Uviéu y pueda tener tola información necesaria pa tomar una decisión tan importante pal so futuru. Animamos a aprovechar estes xornaes como un espaciu d'información, reflexón y contactu directu cola universidá pública asturiana, dixo. Los 17 centros universitarios, tanto propios como adscritos, nos que s'imparten les distintes titulaciones de la institución académica asturiana van tar presentes nes Xornaes d'Orientación Universitaria.
Dende'l Vicerrectorau d'Estudiantes y Empleabilidá programáronse diferentes actividaes que se van desenvolver mientres los cuatro díes, nos que les facultaes, escueles y servicios universitarios van ufiertar el so asesoramientu al estudiantáu de los distintos centros educativos asturianos. Solo los centros inscritos puen asistir a esti eventu, sacante la xornada vespertina propuesta pal miércoles 11, que la so asistencia ye de llibre accesu, pal estudiantáu polo xeneral y les sos families o acompañantes, informa Europa Press.