El programa Alquilámoste yá cuenta con 41 pisos inscritos y cerca de 400 persones demandantes
AGORA
Los propietarios que ponen los sos pisos a disposición de Alquilámoste apuerten a una bonificación del 70% na declaración de la renta del exerciciu en cursu
10 feb 2026 . Actualizado a las 17:51 h.El programa Alquilámoste, que busca movilizar viviendes privaes vacíes p'arrendamientu, yá cuenta con 41 pisos inscritos y cerca de 400 persones demandantes. Asina lo indicó esti martes en comisión parlamentaria'l conseyeru d'Ordenación de Territoriu, Urbanismu, Vivienda y Derechos Ciudadanos, Ovidio Zapico, que precisó que los inmuebles van incorporándose al programa semanalmente, tres de la oportuna inspección técnica y la validación per parte de la comisión responsable.
Los propietarios que ponen los sos pisos a disposición de Alquilámoste apuerten a una bonificación del 70% na declaración de la renta del exerciciu en cursu, una midida que Zapico considera claramente incentivadora. El conseyeru refirióse tamién a la declaración de zones tensionaes y recordó que nestos momentos tán n'esposición pública los proyectos pa doce árees d'Asturies.
Al respeuto, citó datos facilitaos pol Gobiernu de Navarra, que reflexen una reducción media del 8,5% nel preciu de los arriendos nes zones tensionadas mientres el periodu de vixencia de dicha declaración. Al so xuiciu, estes midíes son les fayadices pa garantizar condiciones de vida dignes a la mayoría social y a la clase trabayadora.
«Apostamos por asitiar nel centru los derechos de les persones y l'accesu a una vivienda digna, frente a otros modelos que prioricen los intereses de les inmobiliaries», señaló en referencia al programa puestu en marcha pol Conceyu de Xixón. Tocantes a la xestión de la empresa Vipasa, Zapico destacó que, dende la so llegada a la conseyería, el tiempu mediu de respuesta p'arreglos urxentes en pisos amenorgóse de 10 a 5 díes y comprometióse a siguir rebaxando esos plazos, informa Europa Press.