Salvamentu Marítimu coordinó n'Asturies el rescate de 275 persones nel 2025, un 32% más que l'añu anterior
AGORA
Les actuaciones desenvolviéronse nun total de 118 emerxencies marítimes atendíes n'agües asturianes
11 feb 2026 . Actualizado a las 10:43 h.El Centru de Coordinación de Salvamentu Marítimu d'Asturies, con sede en Xixón y dependiente del Ministeriu de Tresportes y Movilidá Sostenible al traviés de la Dirección Xeneral de la Marina Mercante, coordinó mientres 2025 el rescate, asistencia o busca de 275 persones, lo que supón una medría del 32 por cientu respectu al añu anterior. Estes actuaciones desenvolviéronse nun total de 118 emerxencies marítimes atendíes n'agües asturianes. Nelles viéronse implicaes 43 embarcaciones de recréu, ocho buques mercantes y 26 pesqueros.
Amás, dende'l centru de Xixón controláronse 1.485 buques nes entraes y salíes de los puertos del Principáu. A nivel nacional, Salvamentu Marítimu coordinó a lo llargo del 2025 un total de 7.347 actuaciones marítimes, nes que se rescató, asistió o buscó a 41.387 persones, una media de 113 al día, en tola zona de responsabilidá española de busca y salvamentu.
En relación cola inmigración irregular, l'organismu coordinó la busca de 760 embarcaciones y el rescate de 13.952 persones, lo que supón un descensu del 42 por cientu respectu al añu anterior. Mientres el mesmu exerciciu, Salvamentu Marítimu vixiló más de 226 millones de kilómetros cuadraos de mar per aciu medios aéreos y satelitales y atendió 394 actuaciones vinculaes a la protección del mediu ambiente marín. Coles mesmes, los centros de Salvamentu Marítimu controlaron más de 154.000 buques nos dispositivos de separación de tráficu y otros 154.030 nes entraes y salíes de los puertos, informa Europa Press.