Yá van dellos años del entamu de los esámenes oficiales del certificáu d'acreitación de la llingua asturiana según el formatu homologáu européu al restu de llingües d'enseñu como l’inglés, el francés, l’alemán, etc.
Esti cursu, amás, entamó a poner clases la Escuela Oficial d'Idiomes d'Uviéu cola ufierta del asturianu ente les demás. Col envís d'ampliala a les Escueles Oficiales d’Idiomes de Xixón y Avilés a curtiu plazu.
L'ALLA espublizó l'añu pasáu el métodu Noyos A1 y A2 (básicu), al que siguirán les estayes B y C pal estudiu escritu y oral que sofite l’estidiu pa iguar los esámenes oficiales, cola mesma puntuación que'l restu d'idiomes del Estáu. Amás, pon un cursu B1 - B2 (intermediu), n’Uviéu.
La especialidá docente del idioma propiu ye la llende que torga esa igualdá llaboral nel enseñu, marxinando al profesoráu d'asturianu al torga-yos la ufierta de places fixes al traviés d’oposiciones, de que disponen los docentes de les demás asignatures. Nesi sen trabaya ADAE, l’Asociación de Docentes d’Asturianu y Eonaviegu. Amás cunta col sofitu la mayoría la Xunta Xeneral del Principáu d’Asturies y los sindicatos.
Queda’l preste del Ministeriu d’Educación pa iguar esta desigualdá del profesoráu asturianu énte la so estabilidá.
Y como ye nidiu ye'l pasu previu mientres nun aporte la oficialidá. Que ye l’artículu del Estatutu d’Autonomía qu'afitaría los drechos llingüísticos de los asturianos, torgando d’esta miente la voluntá al debalu de les intituciones pa escoyer la proteición o non de los falantes.
Qu'estos pasos caberos seyan una realidá depende de la escoyeta ciudadana nes vinientes eleiciones nun ye namái deseyu de l’ALLA, sinón el de miles d’homes y muyeres qu’aliten nesti país. Hai que decatase que l’enseñu pasó de 6 centros pilotu nel 1984 a los 31.000 alumnos d’anguaño en toles estayes educatives.
Y que nagüen pola igualdá real de les llingües, entamando pol so estatus de cooficialidá, tantes vegaes apináu d’oportunidaes perdíes dende la Transición.
Acreitar l’asturianu ye una buelga nueva nel camín educativu que s’empobina dende fai cuarenta años nesi sen. La especialidá docente ye la viniente.