El poeta asturianu Miguel Rodríguez Monteavaro organiza'l Festival international de poésie de Québec
AGORA
La primer edición d'esti eventu cultural va celebrase del 5 al 7 de marzu na ciudá mentada cola participaciones de delles llingües minorizaes
02 mar 2026 . Actualizado a las 11:49 h.L’escritor y xestor cultural asturianu Miguel Rodríguez Monteavaro forma parte del equipu organizador del primer Festival international de poésie de Québec (FIP de Québec), un eventu lliterariu nuevu que se va celebrar nel mes de marzu na capital quebequesa y que pretende convertir la ciudá nun espaciu d’alcuentru ente poetes, editores y públicos de distintos países. La organización complétase coles fundadores del festival, les poetes Natalie Fontalvo y Marie Blay.
El festival naz cola vocación de dar visibilidá a la poesía contemporánea internacional en llingües minoritaries y minorizaes y pa crear pontes ente distintos sistemes llingüísticos y tradiciones lliteraries. La programación inclúi llectures públiques, presentaciones de llibros, alcuentros profesionales y actividaes culturales abiertes a la ciudadanía, con participación d’autores d’América, Europa y Asia. Esta primer edición del FIP de Québec tien como leit motiv «La langue comme lieu de résistance poétique» (‘la llingua como enllaz de resistencia poética’), una propuesta multidisciplinar y abierta, con sedes repartíes per distintos espacios culturales de la ciudá. L’oxetivu ye consolidar un nuevu festival internacional dedicáu de manera específica a la poesía y reforzar la proyección cultural de Québec nel ámbitu francófonu y global. La iniciativa, poro, busca fomentar el diálogu intercultural y la circulación de voces poétiques d’oríxenes diversos, creando un espaciu d’intercambiu creativu y profesional pa les llingües, nesta ocasión, occitanu, mapuche, catalán, vascu, romanche, eslovenu, francés quebequense, wendat, innu-aimun, árabe palestinu, gallegu y asturianu.
La presencia de Miguel Rodríguez Monteavaro nel equipu organizador supón tamién una conexón directa cola creación lliteraria asturiana y cola defensa de la diversidá llingüística n’Europa, valores que tán presentes nel espíritu del festival. Rodríguez Monteavaro ye unu de los escritores asturianos contemporáneos que más actividá internacional ta desenvolviendo, con participación n’eventos poéticos en Grecia, India, Exipto, Méxicu, Kenia, ente otros munchos países. La so obra, escrita orixinalmente en gallego-asturianu y asturianu foi traducida a más de 10 llingües y tamién ye’l responsable de Ciclu de poesía QED y del Festival Voces del fornu, dambos n’Uviéu.
El Festival international de poésie de Québec aspira a convertise nun referente nel circuitu de festivales poéticos internacionales, con una programación que combina actividaes escéniques, recitales y alcuentros col públicu, reforzando la presencia de la poesía na vida contemporánea de Québec, un territoriu con un fuerte sentimientu de raigañu cultural y políticu.