El profesoráu d'asturianu y eonaviegu va enzarrase como protesta pola situación de la especialidá docente
AGORA
Critiquen la lentitú cola que'l gobiernu d'Asturies ta faciendo les xestiones correspondientes
03 mar 2026 . Actualizado a las 17:10 h.Un grupu de profesoráu d'asturianu y eonaviegu van enzarrase, el xueves 5 de marzu, nel colexu públicu Cabueñes de Xixón. Van facelo mientres tola nueche como protesta porque consideren que'l gobiernu asturianu ta faciendo con lentitú les xestiones pa que'l Ministeriu d'Educación del estáu faiga los cambeos precisos pa consiguir les especialidaes de los y les docentes mentaes.
Esta acción produzse tres una situación de parón nes xestiones p'algamar la reconocencia de la especialidá docente pal profesoráu d'asturianu y dende ADAE (Asociación de Docentes d'Asturianu y Eonaviego), amenacien con siguir con movilizaciones d'esti tipu hasta ver avances reales sobre esta cuestión, inclusive con movilizaciones na propia sede del Ministeriu d'Educación del estáu. Dende l'asociación denuncien que, depués de que'l gobiernu asturianu firmara'l pactu Asturies Educa, nun hai movimientu pa cola especialidá docente y ye la Conseyería d'Educación quien tien que lliderar esta reivindicación. «Nun entendemos que dende'l gobiernu se permita que'l profesoráu d'asturianu tenga unes condiciones llaborales precaries namás pol estatus xurídicu de la llingua qu'enseñamos», conclúi Claudia Menéndez, presidenta d'ADAE.
En xineru, ADAE axuntó cola conseyera d'Educación, Eva Ledo, treslladando la necesidá d'una reunión cola ministra, de la que nun hai constancia, «como tampoco hai constancia de la solicitú del gobiernu asturianu al Ministeriu pa facer les modificaciones que se traduzan nuna aprobación de la especialidá docente y que si se fixeron cola problemática del peaxe del Güerna va unos díes», denuncien.