La cadena pública asturiana, TPA, va retransmitir les cuatro etapes de la prueba ciclista
12 mar 2026 . Actualizado a las 12:36 h.La Vuelta Ciclista Asturias va volver tener retransmisión televisiva en directo al traviés de la Televisión del Principáu d’Asturies (TPA) dempués de siete años. D’esta manera, la centenaria ronda vuelve a les pantalles per primer vegada dende 2019.
La directora de la carrera, Cristina Mendo, caltuvo recién un alcuentru con representantes institucionales pa concretar los detalles d’esta decisión y coordinar la retransmisión televisiva de les etapes. Pa financiar la emisión van destinase casi 210.000 euros, a los que se suma la aportación de Turismu Asturies, qu'esti añu algama los 62.500 euros, lo que supón un aumentu del 30% dende 2023.
Nel alcuentru destacóse la importancia de recuperar la cobertura televisiva de la prueba, considerada una cita histórica del deporte asturianu. La retransmisión en directo va permitir reforzar la so visibilidá y proyección, averar la competición al públicu aficionáu y contribuyir tamién a amosar Asturies al esterior.
La recuperación de la emisión supón un impulsu importante pa ún de los eventos deportivos con más tradición d'Asturies, celebráu per primer vegada en 1925. Cola so difusión televisiva fortálzase la proyección d’una prueba histórica del calendariu ciclista.
Coles inscripciones entá abiertes, la ronda yá cuenta con 16 equipos confirmaos y va caltener les cuatro etapes de la pasada edición, que foi la del so centenariu. La emisión televisiva va permitir amosar amás los paisaxes y conceyos pelos que pasa la carrera, reforzando la promoción d’Asturies como destín deportivu y turísticu.