Na edición de 2025, presentáronse más de 500 obres al premiu que fai alcordanza del escritor llangreanu
13 mar 2026 . Actualizado a las 16:10 h.El plazu pa presentar obres al Premiu Mánfer de la Llera yá ta abiertu y va ser asina hasta les 23:59 hores del 17 d'abril viniente. Trátase de la cuarta edición d'esti certame internacional de cuentos curtios. Dende Irán a los Estaos Xuníos, pasando per otros 191 estaos nel mundu, cualquier persona pue presentar cuentos n’asturianu o en castellán, nes categorías de mayores o de menores d’edá, y contribuyir a la cultura y la paz mundial.
Esa contribución va agradecese con un premiu de 1.600€ pal cuentu ganador na categoría de mayores n’asturianu, otru de 800€ na de mayores en castellán, un terceru de 400€ na de menores n’asturianu y un cuartu de 200€ na de menores en castellán. Los rellatos pueden mandase per corréu postal o per corréu lletrónicu respetando les bases que se puen consultar nel enllaz https://www.lamontera.org/asturianu/cultural.
La institución organizadora d’esti premiu, la Sociedad Recreativa y Cultural la Montera de Sama, en Llangréu, «agradez la gran cantidá de cuentos participantes en 2025 (más de 500) y espera qu’esti añu vuelva marcase otru récord de participación nesti premiu que quier facer alcordanza del escritor llangreanu Mánfer de la Llera». Manuel d’Andrés Fernández, qu’escribió col alcuñu de Mánfer de la Llera, nació en Les Cuestes, parroquia de Ciañu (Llangréu) en 1918 y morrió en 2005 en Xixón. Foi mineru, sindicalista y escritor comprometíu cola sociedá, la llingua y la cultura asturiana, «encarnando los valores de solidaridá, humanidá y apegu a la tierra que quier promover La Montera».