El Gobiernu d'Asturies avanza na tramitación d'una nueva Llei LGTBI que busca afitar un marcu firme de protección de drechos y llucha contra cualquier forma de discriminación.
19 mar 2026 . Actualizado a las 18:06 h.La normativa, qu'entamará'l so percorríu parllamentariu próximamente, ta plantegada como un pasu decisivu pa dar respuesta a les demandes históriques del colectivu. Dende l’Alministración autonómica insístese en qu'esta iniciativa ye frutu del diálogu y la collaboración colos colectivos sociales, participantes activos nel procesu de preparación del testu. L’oxetivu central ye dotar a Asturies d’una ferramienta eficaz que garantice la igualdá real, la llibertá individual y el respetu pola diversidá.
La llei pretende tamién anticipase a posibles situaciones de discriminación y establecer mecanismos que contribuyan a preveniles, reforciando asina los derechos fundamentales y asegurando que los avances sociales llograos nos últimos años tengan continuidá nel tiempu.
La presentación de la iniciativa coincidió cola puesta de llargu de la XI edición del Festival de Cine LGTBI d’Avilés, que va tener llugar los díes 9 al 19 d'abril d'esti mesmu 2026. Esti festival ye un eventu que se celebra nel Centru Niemeyer y que, col pasu de los años, sigue consolidándose como un referente cultural tamién fuera del ámbitu autonómicu. Un espaciu que ye al tiempu un altavoz pa la realidá del colectivu y un puntu d’alcuentru pa la reflexón social.
Nesti contestu, destacóse la importancia del cine como mediun pa xenerar conciencia y promover cambeos sociales. Les producciones audiovisuales contribúin ampliando l'imaxinariu social de forma decisiva al visibilizar hestories diverses, cuestionar prexuicios y fomentar una sociedá más abierta y inclusiva.
El sofitu institucional a esti tipu d’iniciatives supón una demostración del compromisu del Gobiernu cola promoción de los derechos del colectivu LGTBI y cola construcción d’un entornu onde la igualdá y la diversidá sían principios fundamentales innegociables.