El Muséu del Pueblu d'Asturies repasa 25 años de cartelos n'asturianu nuna esposición
AGORA
La Fundación Belenos donó los documentos que formen esta esposición en 2023
26 mar 2026 . Actualizado a las 12:37 h.El Muséu del Pueblu d'Asturies acueye la esposición 'Cartelos n'asturianu (1976-2000)', una muestra que recueye una selección de materiales gráficos venceyaos a la promoción de la llingua y la cultura asturiana. La colección procede de la Fundación Belenos, que la donó al muséu nel añu 2023. Nella inclúyense cartelos realizaos a lo llargo de más de cuatro décades, formando un conxuntu de 1.983 pieces que van dende 1976 hasta 2021.Esta recopilación constitúi un testimoniu relevante del movimientu de reivindicación del asturianu surdíu na Transición Democrática, col impulsu d’iniciatives como Conceyu Bable y el so conocíu lema a favor de la presencia de la llingua nes escueles.
Los cartelos amuesen una gran diversidá temática, dende actividaes musicales y festives hasta conteníos políticos, ecoloxistes y culturales, toos ellos venceyaos cola defensa y espardimientu del idioma asturianu. Munchos d’estos trabayos, concebíos como pieces efímeres, caltiénense güei namás nesta colección.
Dende un puntu de vista artísticu, la muestra reflexa la evolución del cartelismu n’Asturies, onde conviven estilos inspiraos nel arte popular, célticu o prehistóricu con propuestes más contemporánees. Los autores inclúin tanto profesionales del diseñu y la ilustración como persones venceyaes al movimientu cultural asturianista.
La esposición presenta una escoyeta de los cartelos más antiguos de la colección, facilitando una mirada histórica sobre la evolución de la comunicación visual n’asturianu y el papel del arte gráficu na reivindicación llingüística.