Inaciu Galán representa a la lliteratura asturiana nel IV Encuentro de Poetas Iberoamericanos na Feria del Libro de Teziutlán, Puebla
02 abr 2026 . Actualizado a las 19:55 h.Ente los díes 1 y 6 d'abril la llocalidá mexicana de Teziutlán, en Puebla, recibe al escritor Inaciu Galán, convidáu a participar nel IV Encuentro de Poetas Iberoamericanos en Méxicu.
A lo llargo de la estancia l'escritor va participar de dellos recitales y otros actos con escritores de países llatinoamericanos, incluyendo poetes en llingües orixinaries de Méxicu, nel marcu de la Feria del Libro de Teziutlán, Puebla. Otra asturiana, la escritora Carmen Nozal, que lleva décades viviendo nel país y foi Premiu de les Lletres d'Asturies en 2023, ye la directora del Encuentro de Poetas Iberoamericanos, acompañada pol coordinador d'actos en Teziutlán, el tamién escritor Rafael Luna.
Tán programaes dos conferencies d'Inaciu Galán, una centrada na hestoria y la situación de la llingua asturiana y la so lliteratura, y otra pa falar de la esperiencia de la Residencia Lliteraria Xixón, que l'autor fundó nel 2023 y dirixe dende entós. Per ella pasaron escritores europeos y americanos ente los que s'atopen lliteratos como David Uclés o Marisa Martínez Pérsico.
Xunto al poeta asturianu ta prevista la presencia d'autores como Sergio Briceño (Costa Rica), Jaime Ignacio Magnan Alabarce (Chile), Askari Martre, Angel Herrera, Yao Tonalli, Benito Benazi, Daniela Rico Straffon, Lina García, Eduardo Serdio, Jorge Contreras Herrera, Misael Martínez, Adriana P Velázquez, María Merced Nájera Migoni y Martín Tonalmeyotl (Méxicu).
Inaciu Galán (Xixón, Asturies, 1986) Periodista, documentalista, profesor, xestor cultural y activista llingüísticu, ye miembru de númberu de l'Academia de la Llingua Asturiana.
Escritor en llingua asturiana, tien una quincena de llibros espublizaos y numberosos premios, ente los que s'atopen dalgunos de los de más prestixu pa obres en llingua asturiana. Foi traducíu a delles llingües y participa davezu d'eventos internacionales en representación de la llingua asturiana.
Ente los sos proyectos lliterarios más destacaos tán la fundación de la revista Formientu, pa nuevos autores n'asturianu, con yá venti años d'actividá, y la Residencia Lliteraria Xixón, na que trabaya nel intercambiu cultural ente llingües y lliteratures.