El gobiernu d'España reconoz los horros como Manifestación Representativa del Patrimoniu Cultural Inmaterial

El Conseyu de Ministros aprobó esti martes la declaración de los hórreos del norte de la península ibérica como Manifestación Representativa del Patrimoniu Cultural Inmaterial, una reconocencia que pon l’enfotu nel so fondu valor simbólicu y nel so papel como seña d’identidá en territorios como Asturies. Amás de los horros propios d'Asturies, la declaración inclúi tamién les construcciones de Galicia, Llión, Cantabria, Navarra y País Vascu.

Esta reconocencia rescampla que los horros siguen siendo espacios cargaos de memoria y significáu, onde s’axunten hestories familiares, tradiciones y formes d’organización comunitaria. Esti valor intanxible ye clave pa entender la so relevancia na cohesión social y nel fortalecimientu de la identidá llocal. L’oxetivu d’esta declaración ye garantizar la salvaguarda d’esta dimensión inmaterial, incorporándola de forma esplicita nos procesos d’identificación, documentación, estudiu y difusión d’esti patrimoniu, reforzando’l so reconocimientu y asegurando la so tresmisión interxeneracional.

Sicasí, tamién s’alvierte de los riesgos que tán amenaciando la so continuidá, como la perda de la so función orixinal, la desconexón ente xeneraciones o la desaparición de los contestos culturales que-yos dan sentíu. Poro, la declaración busca garantizar non solo la so conservación material, sinón tamién la tresmisión de los conocimientos y valores venceyaos a ellos.

Con esta midida, el Gobiernu del estáu pretende asegurar que los horros sigan siendo un elementu vivu del patrimoniu asturianu, calteniendo’l so significáu más allá de la so estructura física y reforzando’l so papel como símbolu d’identidá cultural.

---

---

---