Gastrollar convierte la Montaña Central nun escaparate de la so cocina y productu llocal
AGORA
La Montaña Central d?Asturies vuelve ponese nel mapa gastronómicu cola celebración d?una nueva edición de Gastrollar, una iniciativa que se va desenvolver del 21 al 24 de marzu con actividaes distribuyíes per distintos conceyos de la comarca
02 abr 2026 . Actualizado a las 13:50 h.Les xornaes Gastrollar vuelven un añu más con una propuesta que nun va dexar a naide indiferente. Los conceyos de la comarca de la Montaña Central d'Asturies, con Mieres como unu de los principales escenarios, xunen fuercies p'amosar la so bayura gastronómica y siguir confirmando que la cocina tradicional ta más viva que nunca.
Esta edición de Gastrollar céntrase nel emponderamientu de la cocina de carbón, al estilu tradicional y venceyándola cola historia de la minería, destacando'l fuerte carácter matriarcal que tamién ye seña d'identidá de l'alimentación nes comarques mineres.
La conseña d'esta edición «Descubriendo la cocina del carbón» tien equí un significáu doble: d'una banda refier a la cocina na chapa, entendida como esa forma de gastronomía al rodiu de la mítica cocina económica o bilbaína; pero tamién fai referencia a la cocina minera dende'l puntu de vista de l'alimentación de xeneraciones y xeneraciones de mineros, col so calter social, comunitariu y obreru.
Partiendo d'esta cocina tradicional, los distintos restoranes participantes van plantegar les sos propies visiones sobre cómo puede aprovechase'l productu llocal y les nueves técniques pa da-yos una vuelta a les recetes y los sabores de siempres.
Los primeros actos van tener llugar los díes 21 y 22 coles Gastrollar Sessions, una propuesta na que establecimientos hosteleros de la zona van preparar esperiencies culinaries úniques, con menús y actividaes diseñaes específicamente pa estes xornaes y venceyaes al productu de cercanía.
El día 23 va concentrase’l gruesu del eventu col Gastrollar26, que se va celebrar nel Palaciu d’Arriba de Cenera, en Mieres. Esti alcuentru va reunir a profesionales y públicu nun espaciu d’intercambiu y aprendizaxe, con demostraciones de cocina en direuto, charres especializaes y una esposición de productos locales, col propósitu de destacar el valor de la gastronomía de la comarca. La programación va completase’l 24 de marzu con nueves actividaes que se van anunciar próximamente.
Les Gastrollar Sessions, amás, dan cabida a que restaurantes y iniciatives gastronómiques participen activamente creando les sos propies propuestes. Les persones interesaes pueden consultar tola información nes redes sociales del eventu o na so páxina web, onde tamién s’indica cómo reservar en cada establecimientu.
Dende la organización animen tanto a hosteleros como a productores a sumase a esta propuesta, que quier impulsar la cocina del territoriu y reforciar la so importancia como motor económicu na Montaña Central.