El Real Uviéu celebra'l so centerariu poniendo a l'afición nel centru de los festexos
AGORA
El Real Uviéu cumple cien años y esti sábadu 28 pon el ramu a una selmana de celebraciones con un partíu d'históricos qu'enfrentará a los Amigos de Santi Cazorla y los Amigos d'Esteban Suárez
02 abr 2026 . Actualizado a las 13:46 h.El Real Uviéu cumple cien años y la ciudá ta volcada cola celebración. Banderes, bufandes y un sentimientu que nun s'agota vuelven a tomar la capital asturiana, que cumple un sieglu de compromisu col equipu. Dende aquellos primeros pasos nel campu de Vetusta y Teatinos hasta les tardes de fútbol al más altu nivel nel Carlos Tartiere, la historia del Uviéu ta texida con ilusión, resistencia y, perriba de too, con una afición que nunca falló.
A lo llargo d’estos cien años, el Real Uviéu dexó momentos que formen parte de la memoria colectiva del fútbol a nivel estatal. Dende la so presencia destacada na Primera División durante décades, hasta la so cantera de xugadores que marcaron época, el club ye sinónimu de competitividá y dignidá. Nomes como los de Lángara o Herrerita siguen sonando con fuercia ente los más veteranos, demientres qu'otros más cercanos nel tiempu como Esteban Suárez, Diego Cervero o Santiago Cazorla tamién contribuyeron a caltener viva la llama azul.
Pero si hai dalgo que define al Uviéu ye la so xente. L'afición carbayona ye reconocida en tol país pola so fidelidá ensin condiciones. Nun importen les categoríes nin los resultaos: el Tartiere sigue siendo un llugar onde se canta, se sufre y se suaña a comuña. Hubo años duros, especialmente aquellos nos que’l club tuvo que lluchar en divisiones inferiores a les que taba acostumáu del fútbol profesional, pero foi entós cuando se vio la verdadera fuercia del oviedismu. Decenes de miles de persones xuniéronse pa salvar al so equipu, demostrando la máxima de que'l fútbol ye muncho más que un deporte.
La fiesta preparada pa conmemorar esti centenariu quier ser un reflexu d’esa unión. Tres d'una selmana cargada d’actos, música, homenaxes y, sobre too, emoción compartida, esti sábadu 28 va ponese'l ramu con una folixa al nivel de la so afición. L'eventu central de la celebración del sábadu 28 va ser el Partíu del Centenariu, que va enfrentar a los equipos Amigos de Santi Cazorla y Amigos d'Esteban Suárez, a les 18.00 hores nel estadiu Carlos Tartiere.
Primero, la final del campeonatu d'equipos d'abonaos va dir animando l'ambiente. Antiguos xugadores, figures históriques y, por supuestu, los y les aficionaes, van ser los grandes protagonistes. Nun faltarán los cantares, los recuerdos nin les llárimes d’alegría al rememorar tolo que se vivió xuntos y pensando no que se vivirá nesti segundu sieglu del club.
Especial importancia tien el papel de la cantera, que siempres foi un pilar fundamental del equipu. D’ella salieron xugadores que non solo vistieron la camiseta del primer equipu, sinón que tamién llevaron el nome d'Uviéu per otros estadios. Esi apueste pola xente de la casa forma parte del ADN del club y refuerza la conexón cola ciudá y cola so xente.
Los aficionaos, que vivieron momentos críticos como'l descensu a tercera en 2007 y qu'esti añu tan prebando'l miel davezu amargo de la primer división, coinciden en que ye un momentu pa mirar p'alantre. El centenariu ye un emburrión pa siguir puxando por un club históricu que, con una base social fuerte y un sentimientu que nun se ruempe, tien tol futuru per delantre pa siguir escribiendo la so historia. Y si daqué quedó claro a lo llargo d’esti sieglu ye que, pase lo que pase, nunca va tar solu.
Esta fiesta nun ye solo pa celebrar un aniversariu, sinón pa reivindicar una forma de sentir. Porque ser del Uviéu nun ye lo fácil, nin ye una cuestión de títulos o de clasificaciones: ye un sentimientu qu'implica una manera d’entender el fútbol y la vida. Ye alzar la voz cuando más falta fai, ye siguir creyendo cuando too paez en contra, ye sentir como propiu cada gol pero tamién cada derrota. Ye tar fuerte nos momentos difíciles y facer del sufrimientu, virtú.
Asina, ente banderes azules y cantares que resuenen pola ciudá, el Real Uviéu celebra cien años d’historia acompañáu de lo más importante que tien: la so xente. Esa afición que nunca rindió, que siempre tuvo ellí y que güei, más que nunca, demuestra que’l corazón del club late con una fuercia imposible de parar. Porque si’l Oviedo llegó hasta equí, foi gracies a ellos. Y lo que queda por venir tamién lo van escribir xuntos.