Gracies al proyectu Murmullu, de La Benéfica de Piloña, estos dos podcasts van cuntar con grabación y asesoramientu profesional
02 abr 2026 . Actualizado a las 12:18 h.La mocedá asturiana sigue atopando formes nueves de contar y ocupar espaciu, tamién dende lo sonoro. El proyectu Murmullu, impulsáu nel marcu de la iniciativa Razones pa nun marchar del pueblu: una radio comunitaria moza, de La Benéfica, vien de dar a conocer les dos propuestes escoyíes pa la creación de podcast n’asturianu. Tres d’esta selección hai una idea clara: que la cultura d’Asturies tamién se piense, se critique y se celebre dende les voces más nueves.
La primer de les propuestes, Utopía Cochambre, preséntase como un exerciciu de memoria y reivindicación. A lo llargo de trés episodios —Pasáu, Presente y Futuru—, Emma Pérez y Vero Valle constrúin un rellatu qu'enfrenta’l deséu xuvenil cola lentitú alministrativa. El lema «lo público ye’l mio llar» sirve de filu conductor pa una reflexón que va dende les ramples de skate que tardaron décades en llegar hasta debates más amplios sobre la soberanía tecnolóxica y creativa. Nun ye solo un podcast: ye una interpelación directa a cómo se xestiona lo común.
D’otra banda, Píkame’l niki apuesta por un tonu más cercanu y desenfadáu ensin perder la carga crítica. Tres moces, Carlota Bécares, Ruth Celemín y Eva García ponen en marcha un espaciu que busca dar visibilidá a la mocedá asturiana, combinando activismu, cultura y humor. Con artistes emerxentes y una mirada abierta, el proyectu quier demostrar que n’Asturies hai futuru pa la xente mozo, y que quedar nun tendría que ser una decisión a contracorriente.
Dambes iniciatives formen parte d’un impulsu mayor promovíu pola asociación La Benéfica de Piloña, en collaboración cola Fundación la Caixa, que busca reforzar el papel de la radio comunitaria como ferramienta de cohesión y espresión cultural.