108 películes en 21 conceyos, la propuesta de Llaboral Cinematica nel segundu trimestre de 2026
AGORA
La iniciativa algama'l so décimu aniversariu proyectando los curtios con más ésitu de los catálogu de distribución
06 abr 2026 . Actualizado a las 12:26 h.La cinematografía europea llega a 21 conceyos asturianos nel segundu trimestre del añu. El cine européu protagoniza la nueva programación de Llaboral Cinemateca, qu'inclúi siete llargometraxes españoles, trés d’ellos con firma asturiana, y seis curtios realizaos n'Asturies. En total, van proyectase 108 películes ente los 20 conceyos collaboradores y la sede central de la Cinemateca, en Llaboral Ciudá de la Cultura, en Xixón.
Les proyecciones nel paraninfo de la Llaboral van entamar el vienres 10 d’abril. Un día enantes, el xueves 9, la Cinemateca Ambulante va parar en Tinéu y Llanes. Pa Xixón diseñóse una amplia cartelera qu'inclúi lo meyor del cine européu, con ésitos de públicu y crítica como la francesa Love Letters, una comedia dramática lluminosa d’Alice Douard, premiada nel Festival Internacional de Cine de Xixón (FICX), que se va exhibir el 10 d’abril.
Tamién dende Francia lleguen La hija pequeña, tercer llargometraxe de Hafsia Herzi, premiada en Cannes, y la comedia romántica Elegir mi vida, d’Amélie Bonnin. Amás, va poder vese Sorry, baby, la ópera prima como directora de la francoestauxunidense Eva Víctor, gallardonada en Sundance, la Seminci o los Independent Spirit Awards; la aclamada Father Mother Sister Brother, últimu éxitu de Jim Jarmusch; y el nuevu llargometraxe del maestru surcoreanu Hong Sang-soo, ¿Qué te dice esa naturaleza?
El paraninfo de la Llaboral va acoyer tamién la proyección de la obra d’Isabel Coixet Tres adioses y el nuevu llargu de ficción del direutor ucranianu Sergey Loznitsa, Dos fiscales. Igualmente, lleguen a Xixón dos óperes primes mui aplaudíes nos festivales: l’actriz estauxunidense Kristen Stewart debuta como directora con La cronología del agua, y la francesa Charlotte Devillers y el belga Arnaud Dufeys faen lo propio col multipremiáu drama Yo te creo.
Completen esti trimestre dos llargometraxes españoles que van presentar los sos directores: Quién vio los templos caer, de Lucía Selva, y La Lucha, de José Á. Alayón, que va caltener un alcuentru col públicu. Pela so parte, Un año, una noche, dirixida por Isaki Lacuesta, va poder vese nuna sesión especial con banda sonora orixinal en directo a cargu del grupu Fantasma Sur.
La Muestra Asturies va ufiertar dos llargometraxes estrenaos mundialmente nel FICX: La imperfección y la paciencia, d’Álex Zapico, y La Placa, una familia de bien, dirixida por José Antonio Quirós. Pal públicu más mozu va haber trés propuestes d’animación: los llargometraxes franceses Little Amélie, Premiu del Públicu a Meyor Film Européu en Donosti, y Arco, meyor película d’animación nos Premios César, y la selección de curtios Pequeños de Cine.
Llaboral Cinemateca va cumplir en mayu’l so décimu aniversariu y pa celebralo programó la sesión especial Lo meyor de Llaboral Cinemateca Curtios. 10 años de Curtios Asturianos, que va proyectar seis trabayos que formaron parte del catálogu de distribución de curtios y que llograron numberosos premios.
Esta selección tamién va poder vese nos 20 conceyos que collaboren esti trimestre cola Cinemateca Ambulante, igual que’l film d’animación Little Amélie, que va llegar a quince municipios.
Tres l’ésitu de les proyecciones en Xixón el pasáu trimestre, el programa de cine itinerante inclúi La tarta del presidente, ópera prima de Hasan Hadi ganadora de la Cámara d’Oru nel Festival de Cannes, asina como’l documental asturianu Volver a casa tan tarde, dirixíu por Celia Viada. Completa la programación Las líneas discontinuas d’Anxos Fazáns, premiu Rambal-XEGA del FICX.
El FICX encargóse de seleccionar la programación cinematográfica de Laboral Cinemateca, qu'esti trimestre inclúi la collaboración col XI Festival de Cine LGTBI del Centru Niemeyer, l’Asociación VenTEA y el Festival Rizoma.