La Biblioteca d'Asturies Ramón Perez de Ayala acueye los siete alcuentros d'esta iniciativa
08 abr 2026 . Actualizado a las 12:28 h.La Conseyería de Cultura, Política Llingüística y Deporte inaugura esta tarde la cuarta edición de «Palabra Viva». Alcuentros na Biblioteca d'Asturies, un programa entamáu pola Biblioteca d'Asturies Ramón Peréz de Ayala pa fomentar l'intercambiu cultural y reforzar la so ufierta d'actividaes empobinaes al públicu adultu. La primer sesión va tener llugar a les 19:00 hores de güei nel salón d'actos de les instalaciones d'El Fontán, n'Uviéu, cola charra ente les escritores Berta Piñán y Raquel Presumido sobre La lliteratura de lo rural nel sieglu XXI.
Esta nueva edición propón una reflexón plural sobre la creación lliteraria a partir d'enfoques diversos que van dende l'homenaxe a xeneraciones fundamentales, como la del 27, hasta l'analís de formatos y temes como la lliteratura rural contemporánea, la escritura de diarios, el mitu del viaxe, la Ruta 66 o la presencia del gatu como motivu lliterariu. Coles mesmes, acútense espacios pa visibilizar la obra d'escritores n'asturianu y pa favorecer llectures contemporánees d'autores del pasáu.
La programación va desenvolvese a lo llargo de siete xornaes mientres abril y mayu, con entrada llibre hasta completar l'aforu. Tolos alcuentros van empezar a les 19:00 hores y van tener una duración d'una hora aproximao.
La coordinación y moderación del ciclu va correr al cargu d'Ana Lamela Rey, cofundadora del colectivu artísticu-cultural Musa Cafeína. Filóloga, narradora oral, escritora, poeta, xestora cultural y música, ye llicenciada en Filoloxía Española, especializada en Lliteratura, pola Universidá d'Uviéu y cuenta con formación musical nos conservatorios d'Uviéu y Xixón. Publicó trés poemarios, un cuadiernu de poesía y un llibru de cuentos infantiles.