María Arnal, Depresión Sonora, Dora Band y los asturianos Puño Dragón encabecen el VESU 2026
AGORA
El festival independiente sigue celebrando los sos conciertos ente Uviéu y Güeñu del 26 al 28 de xunu
09 abr 2026 . Actualizado a las 17:08 h.María Arnal y el so nuevu proyectu artísticu va ser la banda qu’encabece’l cartel de VESU 2026. La catalana va dar n'Uviéu'l so únicu conciertu n'Asturies presentando l'espectáculu AMA. El primer capítulu del nuevu repertoriu musical d'una de les voces más innovadores del panorama musical contemporáneu, amiesta voz, danza e intelixencia artificial pa esplorar les fronteres de la canción en directo, con una mirada feminista y crítica.
El festival de música independiente que patrocina la Fundación Municipal de Cultura del Ayuntamientu d’Uviéu y el conceyu de La Ribera y que se va celebrar del 26 al 28 de xunu tamién sumó al cartel a Depresión Sonora que va defender sobre l'escenariu Vibra Mahou de VESU'l so nuevu trabayu Los Perros No Entienden Internet. Un discu que lo proyecta dientro de la escena independiente del estáu
Falar de Pimp Flaco y de Kinder Malo ye facelo de dos de los nomes con mayor pesu na escena urbana independiente española. Los dos lleguen a VESU de la mano de Dora Band, la evolución como grupu del so proyectu Dora Black, pa dar el so primer y de momentu únicu conciertu n’Asturies.
Puño Dragón pasaron de ser una promesa a una de les realidaes más potentes del panorama musical actual. La banda de rock alternativu formada Rafa Tarsicio (ex-Tigra), Germán Mingote (Mingote), Manu Huertas (The Parrots) y Erik Iglesias (Destino 48) con un particular imaxinariu musical, que naz del rock tradicional pero amosando sones propios de la escena d’anguaño. El cuartetu torna a casa, Uviéu, pa redondear la xira de la so consagración.
Dempués de más d'una década y seis discos d'estudiu, el tríu barcelonés Mujeres nun pierde'l pulsu nin la frescura. Tornen a VESU col so séptimu discu cargáu de ganes d'amosar que dempués de tantos años, tovía saben escribir cantares que cuerren, choquen y celebren.
Hasta que el mundo estalle nun ye namás el títulu del discu debú de Sobrezero, sinón tamién la premisa sobre la que'l quintetu piensa siguir creando, medrando y tocando. Un trabayu que, pasín ente pasu, conviértelos nuna de les grandes apuestes musicales pa esti añu.
Nuna escena musical onde munches bandes lluchen por facese escuchar, Las Petunias nun solo destaquen, sinón que ruxen. Esti tríu madrilanu de muyeres algamó daqué que poques vegaes s'atopa: la esencia cruda y encantadora de la xente mozo. Mesmu camín y con La virtud del alba debaxo del brazu pa los gaditanos DenisDenis, que tamién van llegar a VESU como amuesa del aire frescu que vive la escena independiente española.
Begut, que yá tuvo en VESU como parte de la banda de Carlos Ares, presenta agora'l so primer álbum, Un diez en lo emocional: una colección de cantares honestos, íntimos, irónicos y cinematográficos na que cada track se convierte nuna postal emocional. Tres un par d'años d'intenses xires pol Reinu Xuníu y Europa, VESU apuesta pol rock crudu y el pop de Snake Eyes. El dúu de Brighton acaba d’asoleyar el so álbum, Cash Rich, un primer trabayu que ta dando muncho de que falar. Pa rematar, un chisgu pa tolos públicos, el cartel complétase con la Billy Boom Band, una banda de rock pa la reciella, apta pa mayores. Asina ye como se definen a sí mesmos. Ellos van ser los encargaos de zarrar la edición d'esti añu na Central Artística de Güeñu.