Los actos coinciden col décimu aniversariu de Laboral Cinemateca Cortos
30 abr 2026 . Actualizado a las 17:25 h.Asturies va ser la anfitriona de la cuarta edición de les Xornaes CORTEN de promoción del curtiometraxe con motivu de la celebración del décimu aniversariu de la puesta en marcha de Laboral Cinemateca Cortos, el programa públicu de promoción, difusión y distribución de curtios asturianos de Laboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Deporte, al traviés de Laboral Ciudad de la Cultura.
Estes xornaes, entamaes en 2023 col oxetivu de potenciar el talentu y xenerar espacios d’intercambiu ente los realizadores escoyíos nos catálogos de curtios de les cuatro comunidaes autónomes, van tener llugar los díes 8 y 9 de mayu nel Paraninfo de Laboral Ciudad de la Cultura.
Les Xornaes ábrense’l vienres 8 de mayu, a les 19.00 hores, cola proyección d’una selección de los curtiometraxes que difunden los catálogos d’Asturies, Cantabria, Navarra y Castiella y Llión. Esta sesión de proyecciones, que cuenta con entrada gratuita, va contar cola presencia de los sos creadores que, amás, van presentar los sos curtiometraxes y van caltener un alcuentru col públicu.
Na parte del catálogu Laboral Cinemateca Cortos va poder vese Tolos fueos el fueu, el caberu trabayu del mierense Diego Flórez, una reflexón sobree'l desvanecimientu de la solidaridá y de los movimientos vecinales que teníen tanta fuercia a finales del sieglu pasáu, incorporando de pasu un mensaxe ecoloxista a esti ensayu premiáu nel FICX col Premiu del xuráu mozu al meyor curtimetraxe de la sección oficial.
Dende Cantabria llega Una playa, un trabayu dirixíu por Juanqui Soto y Luis Paredes, un curtiometraxe sobre l’amistá y l'espertar que recibió’l premiu al meyor curtiu medioambiental nel Festival de Cine de Santander. Nel curtiu d’animación El niño de orejas rojas, María Lucía Suárez Barbery construye un rellatu íntimu sobre la infancia, la enfermedá y la busca d’esperanza, y va representar al catálogu Navarra ShortZinema nestes xornaes. Pela so parte, el catálogu Quercus de Castiella y Llión va presentar La biblioteca, un curtiometraxe de Carlos Zalama estrenáu mundialmente na Seminci.
El sábadu, dende les 09.30 hores, van tener llugar una serie d’alcuentros profesionales dirixíos a realizadores y productores de curtiometraxes. Va haber una presentación de los distintos catálogos de distribución que participen nes Xornaes y Tito Rodríguez, xefe de programación del Festival Internacional de Cine de Xixón, va dar les claves pa la presentación de curtiometraxes en mercaos y festivales.
Asina mesmo, va ponese l’acentu na coproducción ente comunidaes y va zarrase la xornada con una serie de xuntes individuales nes que los realizadores de los distintos territorios van poder conocese ya intercambiar esperiencies como primer pasu pa buscar aliances empobinaes a desenvolver los sos próximos trabayos.