La 47 Selmana de les Lletres Asturianes qu’entama la Conseyería de Cultura, ta dedicada a Taresa Cónsul, primer dramaturga n’asturianu con un entremés representáu en 1789 y al teatru popular asturianu.
Al empar, nel 47 Día de les Lletres Asturianes, l’ALLA espón un añu más la so Xunta Estraordinaria al conxuntu d’Asturies dende’l Teatru Campoamor d’Uviéu. Tamién va ser tresmitida en direuto pela RTPA, como nos caberos años. Coincide amás col Día del Llibru n’asturianu, nel que cola merca d’un llibru o discu nesti idioma amás d’un descuentu del 10% regálase un llibru editáu pa la ocasión.
L’ALLA, foi creyada por Decretu del Conseyu Rexonal (l’ente preautonómicu) nel añu 1980, con dos mandaos, la codificación, normativización y estandarización del idioma y la defensa de los drechos llingüísticos de los sos falantes. Dende la so fundación hebo cuatro presidentes, académicos de númberu, académicos correspondientes y d’honor. Nengún cobra polos sos cargos. Dende la dómina de Xovellanos ficiéronse intentos d’entamala, como la que furruló nel añu 1919 en Xixón. Sicasí interrumpióse.
Ente les funciones de l’ALLA tán la investigación y formulación de la Gramática, empobinar la escritura, reyoyida de vocabulariu, fomentar l’usu y l’enseñu, velar polos drechos llingüísticos y la capacitación na llingua estándar. Nel añu 2000 completó la normativización col Diccionariu de la Llingua Asturiana tres editar les Normes ortográfiques y la Gramática de la Llingua Asturiana.
Espubliza los Cartafueyos normativos y el proyeutu Termast pa campos temáticos nuevos. Tien el so boletín Lletres Asturianes, la revista Cultures y la revista añal Lliteratura. Y Entrambasauguas n’eonaviegu. Editó cientos de llibros. Y el DALLA, diccionariu que cunta con versión dixital. Organiza les Xornaes Internacionales d’Estudiu, los Alcuentros Llingua Minoritaria y Educación, cursos de branu (UABRA), pruebes de conocencia, xunto a dellos concursos.
Ya inclusive’l Congresu Mundial de Cultura Asturiana cola Universidá d’Uviéu. Amás de la esbilla triañal del Premiu Nacional de Lliteratura Asturiana, qu’esta cuarta vegada concédese a Berta Piñán. Nesti periodu democráticu, fízose un descomanáu trabayu p’asitiar l’idioma al altor de los demás, algamando cuasi tolos oxetivos propuestos pola institución académica.
Namái hebo ún que nun se llogró entá, magar tuvo cásique fechu nel 2022: la oficialidá. Polo que fai falta siguir nel camín de la defensa de los drechos llingüísticos asturianos. Habrá otres ocasiones, porque cumplir el mandáu constitucional ye inevitable, como afitó’l presidente de l’ALLA na conferencia de febreru de l’asociación cultural Ástura.