El profesoráu d'asturianu enzárrase na Conseyería d'Educación énte la falta de meyores
AGORA
L'acción produzse depués de la repuesta ambigua dada pol Ministeriu, refugando compromisos concretos
04 may 2026 . Actualizado a las 17:53 h.El profesoráu de Llingua Asturiana enzarróse esta mañana na Conseyería d'Educación, xunto con representantes de CCOO y SUATEA, pa denunciar la falta de meyores na resolución del conflictu llaboral deriváu de l'ausencia d'especialidaes docentes pa la llingua asturiana y l'eonaviegu.
Esta acción produzse tres conocer, el pasáu llunes, la rempuesta del Ministeriu d'Educación, Formación Profesional y Deportes a la iniciativa parllamentaria de control presentada pol diputáu de Sumar, Rafael Cofiño, na que, una vegada más, refúguense compromisos concretos y caltiénse una posición ambigua.
«Sabemos que la conseyera d’Educación ta manteniendo interllocución constante col Ministeriu d’Educación, polo que choca la rempuesta recibida dende’l Ministeriu», señalen dende ADAE. Consideramos que'l Ministeriu nun ta afrontando esta cuestión cola seriedá que merez y sigue ensin ufiertar una solución a un problema qu'afecta directamente a la estabilidá llaboral y a la reconocencia profesional de más de 300 docentes asturianos.
«Al empar, entendemos que'l Gobiernu d'Asturies nun puede llimitase a treslladar la responsabilidá al ámbitu estatal. Esti conflictu precisa d’una rempuesta política firme y una interllocución decidida que dexe desbloquear la situación. Por esti motivu, encamentamos al presidente del Principáu, Adrián Barbón, a esixi-yos al gobiernu central y al Ministeriu d’Educación la seriedá y la contundencia que requier esti conflictu llaboral faciendo valir el pesu que tien como presidente d’una comunidá autónoma del mesmu partíu que’l del gobiernu central», afirmen.
Dende ADAE denuncien que lleven «meses movilizándonos pa esixir una solución. Cuatro meses depués de la llegada al cargu de la nueva ministra, nun se produxo entá nenguna xunta nin consta un pidimientu formal per parte del gobiernu asturianu. Tán dándose pasos bien importantes a nivel sindical y social, pero nel ámbitu políticu la rempuesta sigue ensin tar a l’altura».
«El profesoráu nun puede siguir esperando indefinidamente. Tres casi un añu dende la firma del pactu «Asturies Educa», la falta de meyores resulta cada vez más difícil de xustificar. Nun tamos énte un problema técnicu, sinón énte una cuestión de voluntá política», conclúin. ADAE anuncia que'l profesoráu va siguir coles movilizaciones hasta que'l Ministeriu se comprometa a modificar la lexislación y dar una solución definitiva.