La Brigada Feminista denuncia les «pendientes estremes» de la desigualdá nuna acción reivindicativa na subida ciclista femenina a L'Angliru

Esti sábadu 9 de mayu, les ciclistes de La Vuelta femenina van facer historia al coronar per primer vegada l'Olimpu del ciclismu: L'Angliru. P'acompañales nesti finxu que ruempe un techu de cristal deportivu ensin precedentes, la Brigada Feminista diseñó una intervención de artivismu que xune la épica del pedal cola identidá y la cultura de resistencia de la cuenca minera asturiana.

Esta acción busca dar voz a la conquista del cumal mientres visibiliza una realidá paralela: si L'Angliru ye'l puertu más duru del mundu, ser muyer nesti sistema capitalista ye como subir la so pendiente más estrema. L'acción desenvuélvese en trés acciones complementaries:

Pendientes Invisibles: Cuando'l porcentaxe ye la realidá

Aprovechando la dureza del puertu, la Brigada intervieno les señales oficiales del percorríu, vinculando los porcentaxes de desnivel técnicos coles barreres estructurales que frenen a les muyeres fuera del asfaltu:

• Muriu del trabayu invisible (Les Cabanes): Denuncia del trabayu de curiaos non remuneráu que sostién el sistema capitalista.
• Fienda de Pensiones (Porcío): La factura d'una vida de precariedá llaboral.
• Fienda Salarial (La Cueña les Cabres - 23,5%): Nel puntu más duru, señálase la fienda salarial, onde xube al 32% pa les muyeres migrantes.
• Desigualdá nel poder (L'Aviru): Xubir ensin referentes cuestal' doble.
• Suelu Pegañosu (Los Picones): El 66% de les muyeres atrapaes na precariedá ensin opción d'ascensu.
• Neglixencia Sanitaria (Llagos):Crítica al sesgu machista na salú qu'inora la perspectiva de xéneru.
• Violencia Dixital (Cobayos): Acosu en redes sociales que sufren el 13,7% de les moces.
• Violencia física o sexual: (Xonceo): El 31% de les muyeres en tol mundu (840 millones) sufrieron violencia física o sexual a lo menos una vegada na so vida.

Quilómetros de desigualdá

A lo llargo del asfaltu, la oficialidá del asturianu faise presente nos mensaxes d’ánimu al traviés de les consignes pintaes. Como ye habitual na so práctica, la Brigada Feminista reapropia’l léxicu de la galería pa tresformalu en consignes con perspectiva de xéneru. Con esti llinguaxe de resistencia enraigonáu nel territoriu, el colectivu arropa l’esfuerzu de les ciclistes, grandes protagonistes del día, dexando claro que la so pedalada ye la conquista de toes.

Con consignes como «La fienda salarial pica más que la cueña», «Menos márqueting rosa y más presupuestos reales» o «Más mecha que mieu: ¡Da-y p’arriba!» búscase que les corredores sientan que la so valentía dinamita’l «nun se puede». Al gritu de «Cuenca minera feminista y dinamitera», la Brigada reafirma qu'esti llinguaxe de resistencia pertenez agora a toles muyeres que conquisten espacios. «Nesta subida, el pedal de les protagonistes y la voz del territoriu fúndense: porque si sube una, subimos toes, somos brigada», conclúin.

Llamamientu a la ciudadanía

Dende la Brigada Feminista faise un llamamientu a tola ciudadanía pa subir al puertu esti sábadu 9 de mayu. «Queremos que L’Angliru seya un llar de sofitu y sororidá. Vamos tar ellí pa dar tira a les ciclistes, pa que sientan que nesti valle sabemos lo que ye resistir y que nenguna sube sola», declaren dende’l colectivu. «El oxetivu ye claru: celebrar que les muyeres conquisten el mitu, pero recordar qu'entá queden pendientes invisibles por dinamitar p'algamar la igualdá real».

---

---