Juls Acosta (Ginebras): «Sigue esistiendo fienda de xéneru, cada vez somos más les que tamos emburriando xuntes y eso nótase»

Ginebras consolídense como una de les formaciones más destacaes del panorama indie estatal de los últimos años. El grupu destaca pola so identidá sonora propia y pola creciente presencia nos principales circuitos de conciertos y festivales del país. Nesti marcu, ta prevista la so actuación nel Vibra Mahou Fest Xixón, una cita que va axuntar en Xixón a distintes bandes de la escena musical actual. Con motivu d’esti conciertu, falamos con Juls Acosta sobre la so evolución artística, el so momentu actual y los retos que tienen per delantre.

—Pa dalguién que nun vos conoza, ¿qué ye Ginebras?

—Xinebres naz de l'amistá y del amor a la música. Ye un proyectu mui orgánicu, mui de vivencies reales. Falamos de coses que nos pasen a toles persones, esperiencies que depués la xente garra y da-yos el so propiu significáu, la so propia voz. Y eso ye lo más guapo, cuando un cantar dexa de ser tuyu y pasa a ser de quien lu escucha. Agora tamos nun momentu nel que'l cuerpu nos pidía falar d'otres coses, ver la parte más optimista. Camudemos un poco la estética. Como diz el discu: nun yera pa tanto.

—¿Cómo empezó Ginebras?

—Sandra y Magüi conociéronse na universidá. Facía-yos falta baxista y batería. Entós, punxeron un anunciu buscando integrantes en Tinder y entós apaeció Raquel. Yo conocíles nuna fiesta d'un amigu en común. Si lo pienses, ye una forma bastante orixinal de formar una banda. Mui de la vida.

—¿Qué influencies musicales marcaron más el vuestru estilu actual?

—Criámonos colos Beatles, que ye daqué que nos tresmitieron los nuestros padres y que yá forma parte de nós. Pero pa esti discu queríamos sonar más cañero, con más potencia. Olivia Rodrigo foi una referencia importante, esa guitarra puerca, esi baxu tan marcáu. Y depués los Pixies, Guns N' Roses… queríamos alloñanos un pocu del dream pop y meter un soníu más potente.

—¿Hai dalgún cantar que sintáis que define especialmente quiénes sois como grupu?

—Vueltas defínenos sobre manera. De primeres dicíennos muncho eso de «la vida da munches vueltes» y quedábamos como «¿Eh?»... Pero ye verdá, agora entendémoslo. Tien daqué mui de nueso, mui de Xinebres. Hai una parte que diz «si encuentro silla en este bar, la guardo para ti» que me paez toa una declaración d'intenciones. Yera una situación habitual cuando nos xuntábemos con amigues nes terraces de la Plaza Olavide y les primeres en llegar diben garrando sitiu pa les demás… ¡Que nun yera fácil! Podíemos xuntanos hasta 20 persones (rises). Ye una apoloxía a l'amistá, a tar ehí, a vivir la vida xuntes.

—¿Cómo foi componer Nada es para tanto?

—El conceptu del discu decidímoslu a la fin, que ye curioso. L'orde de los cantares ta mui pensáu pa que tenga un sentíu narrativu. La idea ye qu'a toles persones nos pasen coses mui asemeyaes, y queríamos qu'eso se sintiera. Nun foi fácil tomar toles decisiones, pero creo que quedó daqué con muncha coherencia.

—¿Qué podemos atopar nun directu vuestru?

—Espontaneidá, naturalidá y un viaxe per toles emociones. Mientres esa hora y media o lo que seya, lo de fuera escaezse. Ye como metete nel nuestru universu y que too tea bien. Nuna pómpara enllena de colores y purpurina, ¿por qué non? Pero sobre manera esa sensación d'espaciu seguru, de que nesi ratu too ta bien.

—¿Qué cantar esfrutes más tocar en vivu y por qué?

—Intervención. Góciola ehí enriba, de verdá.

—¿Qué supón pa vosotres tocar nun festival como Vibra Mahou Fest?

—¡Encántanos tocar en festivales! Ye una enerxía mui distinta a la sala, llegues a xente qu'igual nun te conocía de nada y de sópitu tas ehí, compartiéndolo too. Amás compartir cartelu con artistes con una trayectoria asina ye siempre un realcuentru mui guapu.

—¿Qué ye lo meyor y lo peor de trabajar en la industria de la música?

—Lo peor ye que tienes que crear una rutina dafechu distinta a la de la to redolada. Eso a nivel emocional y mental cuesta muncho. Y amás, no fondero los músicos somos mui inseguros. Lluchar coles tos propies bisarmes, cola vulnerabilidá, ye duru cuando amás tas espuesta constantemente. Lo meyor ye'l directu. Ver cómo la to música llega a persones que falen distintu idioma que tu, ver que nel públicu hai neños y persones de cincuenta o sesenta años. Nun hai edá nin llingua que lu pare, que ye xustu lo que dicía Michael Jackson: la música ye'l llinguaxe universal. Y depués tolo que vien alredor: conocer a músicos increíbles (¡inclusive facer una tema con Dani Martín), compañeres… vivir de lo que siempre suañasti.

—¿Atopáis fienda de xéneru nel panorama?

—Sigue esistendo, claro. Pero lo que más me cansa ye qu’entá hai quien nos presenta como'l grupu de moces, como si eso fuera lo definitorio. Non, somos un grupu, yá ta. Tan músiques como cualesquiera. Por suerte cada vez somos más les que tamos emburriando xuntes y eso nótase.

—¿Cuál ye’l to cantar culpable?

—Una d’Alberto Gambino que se llama Purpurina. Déxome llevar a remolera, pero déxome llevar. Ye que'l ritmu ye mui feliz, nun puedo evitalo.

—¿Cuáles son los vuestros próximos proyectos?

—Agora mesmu tamos xirando por festivales hasta ochobre o payares. Y amás acabamos d'anunciar xira de sales pa 2027, que’l 7 de mayu salió a la venta.

---

---

---