El I Festival Internacional del Humor aporta a Uviéu con Lalachus, Daniel Fez y una esposición de Pinín, Pinón y Telva
AGORA
L'eventu va celebrase del 12 al 21 de xunu nel Teatru Filarmónica
14 may 2026 . Actualizado a las 16:20 h.Uviéu va acoyer ente’l 12 y el 21 de xunu la primer edición del Festival Internacional del Humor (FIHU), una nueva cita cultural impulsada pol Conceyu d’Uviéu y dirixida pol humorista asturianu Joaquín Pajarón. El festival naz cola intención de convertir la ciudá nun referente del humor y la comedia, combinando monólogos, espectáculos, talleres, charres y actividaes culturales pa tolos públicos.
La inauguración va celebrase nel Teatru Filarmónica cola actuación «¡Sin filtros, todo es más divertido!», protagonizada por Carolina Noriega y Anaís. Nel programa tamién participen artistes y cómicos conocíos como Agustín Jiménez, David Puerto, Ger, JJ Vaquero, Lala Chus, Bertus y Dani Fez, qu’estrenará n’Uviéu’l so espectáculu «Estamos cucu de la cabeza».
El festival va contar amás cola grabación en directo del podcast «Pan de Gambas», amás de proyecciones y coloquios abiertos al públicu. Una de les actividaes más destacaes va ser la proyección de «Sujétame el cubata», siguida d’un alcuentru col equipu de la película y cola participación de JJ Vaquero. El zarru del FIHU va incluyir una gala especial de «Radio Pajaronia» dedicada a Gomaespuma, cola presencia de Juan Luis Cano.
Amás de los espectáculos, el FIHU va desenvolver actividaes sociales y culturales en distintos barrios d’Uviéu. Van celebrase talleres de maxa en Vallobín, sesiones de risoterapia en Buenavista y El Cristu II y actividaes familiares como «Dreaming Bubbles», pensaes pa públicu infantil y familiar. La organización destacó que’l festival busca sacar el humor a la cai y acercalu a tola ciudadanía.
Otra de les apuestes del festival va ser la presencia d’una esposición dedicada a la figura d'Alfonso Iglesias al traviés de Pinín, Pinón y Telva, completando una programación que xune artes escéniques, cine, ilustración y participación ciudadana. Dende la organización señalaron que’l FIHU naz con vocación de continuidá y cola intención de medrar nes próximes ediciones, consolidando Uviéu como un espaciu cultural dedicáu al humor y al entretenimientu.