La ciudá vivió una xornada entamada por Mahou dedicada al xéneru con hasta 7 conciertos
19 may 2026 . Actualizado a las 11:46 h.El Recintu Ferial d’Asturies Luis Adaro foi esti 16 de mayu un formigueru de xente con ganes de directos, d’estribillos coreaos y d’esa comunión colectiva que solo se da nos festivales. El Vibra Mahou Fest aterrizó na ciudá con un cartelu cuidáu y una idea clara: celebrar l’indie en toles sos formes.
La tarde arrancó con Drugos, que nun tardaron en marcar el tonu cola so potencia sobre l’escenariu. Xugaben en casa y notábase. Soníu crudu y directu pa empezar a espabilar a un públicu que, poco a poco, foi ganando presencia nel recintu.El relevu llegó con Fillas de Cassandra, protagonizando unu de los primeros momentos destacaos de la xornada. La so propuesta, que mezcla tradición y lletrónica, aportó matices y sorprendió a munchos de los asistentes, que respondieron con atención y aplausos.
Col ambiente yá en marcha, Anabel Lee dio un pasu alantre n'intensidá. Cargaos d’actitú, conectaron rápido con un públicu cada vez más enchufáu, preparando’l terrén pa lo que vendría depués. Esi cambéu d’enerxía consolidóse con Parquesvr, que llevó’l festival a un terrén más irreverente y despreocupáu. El so estilu, a mediu camín ente’l punk y la performance, aportó frescura y rompió moldes nel ecuador de la xornada, onde nun faltó la comedia, sobre manera col cantar Juancarlista.
Yá cola tarde cayendo, Ginebras convirtió’l recintu nuna auténtica fiesta. Los sos temes pegadizos fixeron cantar a tol públicu, nun de los momentos más coreaos y celebraos del día, celebrando l'espoxigue d'unu de los grupos indies que más tán triunfando anguaño.
El tramu final guardaba dalgunes de les actuaciones más esperaes. Alcalá Norte supo mantener el nivel con un directo solvente, confirmando’l so bon momentu y calteniendo l’atención d’un públicu que yá vivía’l festival con total entrega. D'esta manera, tocó per primer vez el so single nuevu, Los llamados pitagóricos, amás d'ablucar al públicu con una versión de Gimme! Gimme! Gimme! (A Man After Midnight), d'Abba y entá más ablucante la versión del cantar Fils de Lucifer, de la banda francesa Icare. Tamién el vocalista Álvaro Rivas fixo un chisgu a Asturies, vistiendo una camisa de trabayu de la estinta ENSIDESA.
El zarru corrió al cargu de León Benavente, que punxo'l ramu con autoridá. La banda demostró una vegada más la so solidez sobre l’escenariu, con un repertoriu que funcionó como un güelpe final d’enerxía pa una xornada vibrante.