Deposítense 451 etiquetes de trabayos de la Compañía Asturiana d'Artes Gráfiques nel Muséu del Pueblu d'Asturies
AGORA
La donación procede de José García Álvarez (1919-1994), que foi director-xerente dende 1959 hasta 1970
27 may 2026 . Actualizado a las 11:28 h.El Muséu del Pueblu d’Asturies acaba de recibir en donación un mostrariu de trabayos de la Compañía Asturiana d'Artes Gráfiques, de Xixón, que contién 451 etiquetes, envueltes de tabletes de chicolate y pequeños cartelos realizaos ente 1945 y 1965 por esta empresa, que foi la más importante industria litográfica que tuvo Asturies nel sieglu XX.
Los impresos tán pegaos nes fueyes d'una llibreta de 24,5 x 32 cm y en fueyes sueltes d'esa mesma midida. El so estáu de caltenimientu ye mui bonu. Gracies a esta colección constátase, per un llau, la riqueza y la calidá del trabayu d'esta litografía xixonesa y, per otru, la espansión xeográfica del negociu, que tomaba casi toa España, nun periodu pal que se caltienen pocos testimonios.
Los trabayos destaquen pola calidá de los dibuxos y los vivos colores. Hai etiquetes pa botelles de bébores alcohóliques (sidra champagne, anís, vinu, vinu quináu, cerveza, xinebra, brandy, xerez y ponche); botelles de llexía; llates de conserves vexetales (piescu, pimientos asaos, alcachofes, arbeyos, tomate); llates de conserves de pexe (bonitu salmonao, bonitu con arbeyos); llates de fabada; caxes de galletes; paquetes d'achicoria; caxes de puros; quesos; productos cárnicos; envueltes de tabletes de chocolate y de carambelos; etc.
La Compañía Asturiana d'Artes Gráfiques trabayaba principalmente pa empreses d'Asturies, Galicia, Castiella, Llión, Andalucia y Murcia, y tamién de La Rioxa, Nafarroa, La Mancha, Bilbo, Aragón, Alicante, etc. Tenía una bona rede de viaxantes, sobremanera nos llugares onde se concentraben industries agroalimentaries y de bébores alcohóliques.
Esta Compañía Asturiana constituyóse en Xixón el 1 de xunu de 1901. Según Francisco Crabiffosse Cuesta, foi una iniciativa del llitógrafu y dibuxante Julio García Mencía y l'empresariu Alberto Paquet García-Rendueles a la que se sumaren dellos industriales xixoneses. Establecióse nel barriu d'El Natahoyo y trabayaba la litografía, la fototipia, el fotograbáu y la tipografía. En 1911 convirtióse nuna sociedá anónima. Foi, mientres el sieglu XX, la empresa más grande nel ramu de les artes gráfiques xixoneses y asturianes. Nella trabayaben más de cien persones, de les cuales casi la metá yeren muyeres.
«La realización de tou tipu de trabayos dientro del ramu de les artes gráfiques y la permanente modernización de la maquinaria, asitiaron a la Compañía Asturiana d'Artes Gráfiques a la cabeza del sector litográficu rexonal». Mientres la Guerra Civil foi prindada pol Frente Popular, y nes sos máquines fixeron los cartelos de propaganda del bandu republicanu roblaos por German Horacio, Meana, Goico Aguirre y otros. En 1945 una quema destruyó gran parte de les instalaciones. Cesó de trabayar en payares de 1970. El mostrariu qu'ingresa agora nel muséu ye un testimoniu de la última dómina de la fábrica, ente 1945 y 1965, de la que se conocíen bien pocos exemplares.
El Muséu del Pueblu d’Asturies conserva nos sos fondos dos grandes colecciones d'estos materiales procedentes de Litografía Muñiz y de Litografía Viña, dambes de Xixón. Son materiales difíciles de consiguir y mui raros, yá que les etiquetes y les envueltes son impresos d'usu cotidianu y efímeru, d'usar y tirar. L'ingresu d'esti mostrariu de la Compañía Asturiana d'Artes Gráfiques S. A. amplia y arriquez considerablemente la colección d'artes gráfiques del muséu.
El mostrariu vien de José García Álvarez (Xixón, 1919-1994), que foi director-xerente de la empresa dende 1959 hasta'l so zarru en 1970. Entró a trabayar nella en payares de 1937, con 18 años, y siempre tuvo dedicáu a xeres d'alministración. Amás del mostrariu, tamién ingresaron nel muséu otros materiales rellacionaos col trabayu d'impresión: un rodiellu, planches de bronce d'impresión d'etiquetes y otros documentos. García Álvarez, según la so fía Amparo García Villar, «quixo qu'esto fuera parte de la so vida nun se perdiera». El restu del archivu desapaeció col zarru de la empresa. La donante ye Amparo García Villar, de Xixón.