El discu ye'l so quintu album d'estudiu y sal como continuación del asoleyáu en 2020, «Amadeus»
01 jun 2026 . Actualizado a las 11:06 h.El músicu uvieín Haim Álvarez torna con fuerza a la escena con Domum, el so quintu álbum en solitariu, un trabayu ambiciosu que consolida la so evolución artística escontra terrenos conceptuales y narrativos. Esti nuevu llanzamientu non solo amplía'l so universu creativu, sinón qu'actúa como continuación espiritual de Amadeus (2020), el discu que-y valió la reconocencia nos Premios AMAS como Meyor Artista Revelación y que supunxo la so irrupción nel panorama musical asturianu.
En Domum, Álvarez constrúi una distopía sonora que reflexona sobre'l futuru de la humanidá, afrontando temes como la identidá, el progresu tecnolóxicu, l'alienación y la perda de lo esencial. L'álbum plantega una mirada crítica pero tamién introspectiva, sofitándose nuna narrativa que conecta los sos cantares como si fueren capítulos d'una mesma historia. Musicalmente, el proyectu combina elementos de música electrónica, clásica contemporanea y pop esperimental, reforzando'l so calter cinematográficu.
El discu grabóse nos Estudios 15:40, allugaos en Perdones (Gozón), un espaciu cada vez más relevante dientro de la producción musical asturiana, y darréu masterizáu en Kadifornia Mastering (Cádiz), estudiu reconocíu a nivel nacional pol so trabayu con artistes de diversos xéneros.
Ún de los aspectos más destacaos de Domum ye'l so calter collaborativu. Nel álbum participen numberosos músicos asturianos como Luis Senén Fernández, Jacobo de Miguel, Andrés García, Begoña Venegas, Lyla Swam, Fernando Malva y Fon Fontis, amás del Cuarteto Arpeggio, que la so aportación refuerza la dimensión orquestal del proyectu. Tamién intervién l'escritor madrilanu Antonio Ballesteros, apurrendo un componente lliterariu qu'arriquez la narrativa conceptual del discu.
Con esti trabayu, Haim Álvarez non solo reafita la so identidá artística, sinón que da un pasu más escontra propuestes musicales más complexes y tresversales, onde la música dialoga cola lliteratura y la reflexón filosófica. Domum ta disponible en toles plataformes de streaming dende'l 29 de mayu, y perfílase como ún de los llanzamientos más interesantes del panorama independiente asturianu del añu.