La entidá financiera va asumir el 40% de la delda de la empresa con terceros y alcuerda col Executivu la reestructuración de los creitos pendientes pa garantizar la viabilidá futura
02 jun 2026 . Actualizado a las 17:25 h.Ovidio Zapico, anunció güei na Xunta Xeneral que'l gobiernu asturianu va mercar por 1€ el 40% de les acciones de Sedes que permanecíen en manes de Unicaja, una operación que va dexar avanzar de forma significativa na conversión de la sociedá nuna empresa íntegramente pública.
L'alcuerdu alcanzáu va dexar al executivu asturianu mercar el paquete accionarial d'Unicaja por un preciu simbólicu, mientres que la entidá bancaria va asumir el 40% de la delda de Sedes con terceros nel momentu de la venta. Amás, dambes partes alcordaron la reestructuración de los creitos pendientes pa que la empresa pueda facer frente a los sos compromisos nun horizonte de 22 años.
Zapico defendió que la operación remata'l trabayu desenvueltu mientres la llexislatura pa garantizar la continuidá de la empresa, caltener l'emplegu y consolidar una ferramienta pública al serviciu de les polítiques del Gobiernu d'Asturies. «Siempre creyí que pagaba la pena facer un esfuerzu pa reflotar Sedes porque pue desempeñar un papel mui importante como preséu auxiliar de les polítiques públiques», señaló. Según indicó, la compañía yá participa n'actuaciones vinculaes a la vivienda pública per aciu trabayos de caltenimientu y arreglu pa Vipasa y collaboró tamién na construcción de siete escuelines, ente otros proyectos.
El titular de Derechos Ciudadanos apostó por afondar na coordinación ente los preseos públicos vinculaos al suelu y la construcción p'aprovechar sinerxes y dar una rempuesta más eficaz a los retos residenciales. «Si cuntamos con ferramientes públiques en materia de vivienda, de xestión de suelu residencial ya industrial y de construcción, tenemos enforma avanzao pa evitar futures crisis como la que güei tamos careciendo», aseguró.