El Colexu Públicu Peña Tú de Llanes publica'l so single Pericote Peña Tú resultáu del proyectu de música tradicional desendolcáu nesti cursu 2025-26
AGORA
El proyectu ta dirixíu y producíu por Vítor Carbajal y cunta col sofitu técnicu ya instrumental de la Banda Gaites Llacín
04 jun 2026 . Actualizado a las 17:39 h.El Colexu Públicu Peña Tú presenta’l Pericote Peña Tú, una pieza musical frutu del trabayu desenvueltu nel área d’Educación Artística, concretamente na asignatura de Música. Esti proyectu ta dirixíu y producíu por Vítor Carbajal. El desenvolvimientu de tol procesu d’enseñanza-aprendizaxe enfotóse a tola etapa d’Educación Primaria de manes de Carlos José de la Fuente y el propiu Carbajal, dambos maestros d’Educación Musical nel Colexu Públicu Peña Tú. Xunióse-yos darréu Ángela Meana.
Al traviés d’esti proyectu, l’alumnáu d’Educación Primaria averóse y deprendió la música tradicional del Oriente d’Asturies y del conceyu de Llanes, partiendo d’un tema tan sonáu pa esta fastera como ye “El Pericote”. Nel segundu trimestre d’esti cursu 2025-26 desendolvióse la presentación, análisis y aprendizax del emblemáticu tema y foi nes primeres selmanes del mes de mayu cuando tol alumnáu de Primaria participó nun procesu de grabación por pistes nel estudiu de la Escuela de Música Tradicional y la Banda Gaites Llacín de la que tamién ye director Vítor Carbajal. El resultáu final xune dos llinies interpretatives: la versión más instrumental del Pericote, cola base de gaita y tambor, y la versión cantada acompañada de percusión tradicional —pandereta, panderu y tambor. Too ello baxo una llinia conceptual d’instrumentación escolar dando como resultáu una versión emocionante na que rescampla la instrumentación y les voces blanques de tol alumnáu d’Educación Primaria del Colexu Peña Tú.
Dende’l planu musical, el director del proyectu destaca'l sofitu de les Escueles de Música Clásica y tradicional, asina como a la Bandina y Banda Gaites Llacín pol sofitu técnicu ya instrumental. Tamién destaca la collaboración de los tres Bandos de Llanes pal trabayu d’adaptación a una versión musical que xune les estremaes llinies interpretatives nuna llinia especial adaptada a les voces blanques infantiles de la Villa. El resultáu del mesmu puede reproducise nes distintes plataformes dixitales, a la vez que tamién van colócase enllaces QR en pequeños carteles sitiaos en puntos clave de la Villa como muestra d’unu de los principales símbolos d’identidá de Llanes, que sigue vivu nos más pequeños.