Medalla y Calatrava encabecen el festival, con Montefurado, Zoketes, Ballbreakers, Je?Texas, Aitor Ochoa & Mad Mule y Paxareto completando'l cartel
12 jun 2026 . Actualizado a las 05:00 h.El festival Mieres Underground & 33600 vuelve un añu más cola so propuesta de rock duro y bon ambiente pal vienres 12 y sábadu 13 de xunu. El programa, que dende'l vienres va enllenar de rock la plaza La Llibertá, inclúi una comida na cai, amás de los DJ sets pa completar una propuesta que sigue calteniendo la so vocación popular al nun cobrar entrada.
El cuartetu barcelonés Medalla y el tríu vallecanu Calatrava son dos de los grandes reclamos del cartel de la nueva edición del festival Mieres Underground & 33600 que va celebrase esti vienres y sábadu na plaza La Llibertá de Mieres. L'eventu, que sigue siendo d'accesu llibre, va axuntar una decena de propuestes musicales ente les que s'atopen grupos como Montefurado, Zoketes, Ballbreakers y, el vienres, Je’Texas, Aitor Ochoa & Mad Mule y Paxareto. La programación va incluyir amás como cites destacaes una nueva edición de la comida na cai, y dos sesiones DJ con Fee Reega y Petri Glamour y Marypertur (esta última nel restorán TC28).
L'apertura oficial del festival va ser esti vienres a les 20:00 hores, con accesu a les zones de barra, merchandising y marketplace. A les 21:00 hores, va ser el grupu asturianu Paxareto l'encargáu d'abrir el programa de la primera de les xornaes del Mieres Underground & 33600. Esta primer xornada ta programada pol colectivu Insonorizados y va incluyir los conciertos de los cántabros Aitor Ochoa & Mad Mule, y la formación d'Austin, Je’Texas, col so estilublues-rock texanu.
La xornada grande del festival va llegar el sábadu, cola apertura del recintu de la plaza La Llibertá a les 12:00 hores. A les 13:00 hores va empezar la sesión vermú que va cuntar col DJ set de Fee Reega, quien va encargase d'animar eses primeres hores pa que, yá a partir de les 15:00 empiece una nueva edición de la comida na cai. Nesta ocasión, el menú inclúi ‘arroz con coses’ al cargu del restorán TC28, tarta de quesu del restorán Monte de San Feliz (L.lena) y café d'especialidá servíu por Ca Silverio.
Tres la comida, parte de l'actividá va treslladase precisamente al restorán TC28, onde va tener llugar la sesión de tardéu del DJ set de Petri Glamour y Mary Pertur, mientres na plaza van empezar les pruebes de soníu y los preparativos de la segunda xornada de conciertos. Los asturianos Ballbreakers van ser los encargaos d'abrir el programa a les 20:30 hores col soníu d'apisonadora stoner-punk marca de la casa, pa dexar pasu al grupu punk lleonés Zoketes una hora depués. A les 22:30 va saltar al escenariu Montefurado, grupu asturianu integráu por vieyos conocidos del rock llariegu y que ta teniendo una acoyida perbona col so últimu llanzamientu discográficu. La nueche van zarrala los vallecanos Calatrava, qu'autodefínense como un tríu de “punk, noise y post-hardcore paríu en Madrid con cero glamour”, a partir de les 23:30 hores, y los catalanes Medalla, que son una de les sensaciones del últimu añu y que lleguen a Mieres tres d'esllumar al públicu en festivales como'l Primavera Sound o el Tsunami Xixón.
Dos díes de rock, potencia y directos aplastantes pa los amantes del xéneru, de bon ambiente pa toles edaes, de compañerismu y comunidá al rodiu de la música pero cola motivación clarísima de facelo por y pa la xente. Un añu más faciendo barriu al rodiu d'una pasión compartida que consolida a esti festival como una de les cites obligaes del branu asturianu más rockeru.