Nuna segunda votación concluyente, la periodista xixonesa algamó la mayoría absoluta necesaria pal so nomamientu al puestu que taba vacante dende entamos d'añu
11 jun 2026 . Actualizado a las 13:29 h.La periodista xixonesa Azahara Cañedo Ramos (Xixón, 1985) superó con ésitu esti mesmu miércoles la votación que la postulaba como nueva directora de la Radio Televisión del Principáu d'Asturies (RTPA) nuna segunda ronda que tuvo llugar nel plenu de la Xunta Xeneral del Principáu pa proceder a la so designación.
Tres d'una primer vuelta na que nun algamara los 30 votos necesarios, procedióse a una segunda votación, suxeta nesti casu al criteriu de mayoría absoluta. Nesta segunda votación, Cañedo llogró l'apoyu de 23 de los 45 diputaos y diputaes, algamando asina esa mayoría absoluta que la valida como próxima directora de RTPA. Cuntando col apoyu del bloque socialista que la propunxere, foron IX-Convocatoria por Asturies y la diputada del Grupu Mistu Covadonga Tomé quienes, tres plantegar una serie de condiciones, apoyaron la candidatura permitiendo'l nomamientu. Ente les demandes de los diputaos d'izquierdes p'apoyar la candidatura figuraben dalgunes como la d'internalizar servicios esenciales o la meyora nel tratamientu de la diversidá llingüística y cultural de la sociedá asturiana na programación de RTPA.
Nuna votación de papeleta y urna, la candidatura de Cañedo consiguió esos 23 apoyos que-y permitieron llograr l'ésitu frente a los 18 votos en blancu de PP y Foro y los tres nulos de Vox. Cañedo sucede asina al anterior director de RTPA, Francisco Orejas, quien acoyíase a la xubilación tres renunciar al cargu a entamos d'esti mesmu añu. Tres varios meses col puestu vacante, la periodista xixonesa vien a cubrir esi llugar con una propuesta centrada nes llingües y la cultura d'Asturies, l'alfabetización del públicu frente a los bulos y la normalización de la plantilla.
Llicenciada en Comunicación Audiovisual por la Universidad Carlos III y doctora n'Investigación en Medios de Comunicación, Cañedo ye profesora titular de Periodismu na Facultá de Comunicación de la Universidá de Castiella-La Mancha, onde ocupa'l cargu de responsable de Comunicación Institucional. La so tesis doctora, Televisión del Principado de Asturias: dinamización y diversidad en el sector audiovisual asturiano (2005-2015) foi reconocida col Premio de la Asociación de Universidades con Titulaciones en Información y Comunicación (ATIC) a la meyor tesis doctoral del añu 2020. Arriendes d'esto, Cañedo tien investigao a fondu'l valir de los servicios audiovisuales públicos nel contestu del capitalismu de plataformes, llogrando l'Europearn Journal of Communication Article of the Year Award 2022.