Asturies impulsa la protección de la cultura de la gaita, les dances y les mazcaraes d'iviernu
AGORA
La conseyería avanza tamién nos trabayos previos pa salvaguardar la Cultura Quesera Asturiana
16 jun 2026 . Actualizado a las 18:38 h.La xunta del plenu del Conseyu del Patrimoniu Cultural d'Asturies informó favorablemente de la incoación de los espedientes pa declarar como Bien d'Interés Cultural (BIC) la Cultura Asturiana de la Gaita, la Danza n'Asturies y les Mazcaraes d’Iviernu.
Agora la conseyería va aprobar les resoluciones d'incoación. Según la Llei de Patrimoniu Cultural d'Asturies, esti pasu implica l'aplicación provisional del réxime de protección propiu de los bienes declaraos BIC. A partir d'entós, los espedientes van siguir la so tramitación cola solicitú d'informes a instituciones consultives, asina como cola apertura de los correspondientes periodos d'información pública y presentación d'alegaciones. Una vegada completáu'l procesu, les propuestes van tornar al Conseyu pa un informe final enantes de la so elevación al Conseyu de Gobiernu, que tendrá d'aprobales definitivamente per aciu decretu.
D'otra banda, el plenu emitió informe favorable definitivu pa declarar l'alzada n'Asturies como BIC de calter inmaterial, polo qu'esti espediente va ser alzáu directamente al Conseyu de Gobiernu pa la so aprobación final.
Cultura asturiana de la gaita
El Conseyu alcordó empecipiar l'espediente pa declarar BIC la Cultura Asturiana de la Gaita, unu de los elementos más representativos de la identidá cultural d'Asturies, presente n'ámbitos festivos, institucionales y sociales. La gaita articula un ampliu conxuntu de práctiques qu'inclúin la interpretación musical, la tresmisión de repertorios, la fabricación artesanal del preséu y el so usu en contestos diversos. La so continuidá sofítase nuna comunidá activa d'intérpretes, constructores y agrupaciones.
La Danza n'Asturies
Tamién s'aprobó la incoación del espediente pa la declaración como BIC de la Danza n'Asturies. Trátase d'un conxuntu diversu d'espresiones coreográfiques vinculaes a celebraciones festives y rituales, con amplia implantación territorial y fuerte carga identitaria. L'espediente recueye tanto les dances con práctica siguida como aquelles recuperaes nes últimes décades, y empresta especial atención a la Danza del Portal de Villaviciosa, surdida a mediaos del sieglu XX como evolución de les tradiciones anteriores.
Les Mazcaraes d’Iviernu
El plenu empecipió coles mesmes l'espediente pa declarar BIC les Mazcaraes d’Iviernu. Estes celebraciones, vinculaes al ciclu festivu ivernizu, combinen personaxes amazcaraos, música, escenificación y ritualidá. Trátase de manifestaciones culturales complexes, con un fuerte raigañu comunitariu, que se caltuvieron vives gracies a la so tresmisión xeneracional. La so protección va dexar reforzar el so caltenimientu.
L'alzada n'Asturies
El Conseyu emitió informe final favorable pa declarar l'alzada como BIC inmaterial. Esta práctica tradicional, basada nel desplazamientu estacional del ganáu, foi clave na configuración del territoriu y de les formes de vida rurales. L'espediente cunta yá col respaldu de la Universidá d'Uviéu y del RIDEA, y va ser eleváu al Conseyu de Gobiernu pa la so aprobación definitiva. Amás, l'alzada ta reconocida pola UNESCO como Patrimoniu Cultural Inmaterial de la Humanidá.
Cultura quesera asturiana
La conseyera informó tamién del impulsu de los trabayos previos pa la futura declaración como BIC de la Cultura Quesera Asturiana, coles mires de reconocer y protexer esti legáu vinculáu al mediu rural y a les tradiciones d'ellaboración artesanal del quesu.
Casa del Marqués de Aledo (Ribeseya)
Nel ámbitu del patrimoniu inmueble, alcordóse empecipiar los trámites pa declarar BIC, na categoría de Monumentu, la Casa del Marqués de Aledo. Construyida en 1920 na colonia de Santa Marina, destaca como exemplu de l'arquitectura residencial del primer terciu del sieglu XX n'Asturies, con una singular influencia de les Cases de la Pradería de Frank Lloyd Wright.
Rehabilitación del Casino de Llanes
El plenu informó favorablemente del proyectu de rehabilitación del Casino de Llanes, yá declaráu BIC. L'actuación inclúi l'arreglu de cubiertes, meyora del aislamientu, restauración d'elementos interiores y adaptación en materia d'accesibilidá, con condiciones específiques pa garantizar el respetu a los sos valores patrimoniales.