La proyección va tar acompañada d'un alcuentru deportivu popular d'artes marciales
17 jun 2026 . Actualizado a las 10:35 h.La Coordinadora Xuvenil Socialista entama la presentación del documental «Cuando surgen los monstruos. Conocer y confrontar el fascismu nel sieglu XXI», producíu por Diariu Socialista, esti sábadu a les 13h na Casa Sindical de Xixón.
Trátase d'una producción independiente qu'afronta'l resurdimientu del fascismu na nuestra dómina, ufiertando una caracterización del mesmu «pa entender la puxanza reaccionaria que travesamos. ¿Cuáles son les motivaciones d'esti fenómenu y, sobretou, qué podemos facer pa combatilo? Esti y otres interrogantes son los que'l llargumetraxe se propón esclariar, al traviés d'entrevistes y conversaciones con periodistes y militantes antifascistes de diferentes Estaos europeos», afirmen dende la coordinadora.
L'espardimientu y aceptación de los partíos d'ultraderecha, los grupúsculos escuadristes qu'exercen violencia con impunidá y la base social reaccionaria que llexitima y alimenta'l so discursu son los trés elementos que'l documental analiza como espresiones de la fola fascista n'Europa. Primero de too, preséntase a sí mesmu como un mediu d'análisis, llucha y resistencia pa la clase obrera, que tien de dotase de ferramientes polítiques pa facer frente a la meyora de la reacción.
El documental presentóse yá en Sevilla, Granada, Valladolid, Salamanca, Murcia, Burgos, Madrid, asina como en Bilbo, Baiona, Araba, Nafarroa y Donostia, allegando cientos de persones a la proyección. En Xixón, amás, al documental va siguilu un alcuentru deportivu popular d'artes marciales, que va dar empiezu a les 17 hores.