Guieldu sofita la presencia de la música asturiana en Francia cola so actuación en Les Roches Celtiques
AGORA
El grupu va actuar en Saint-Étienne, ciudá francesa convertida en referente de reconversión cultural, nunu de los festivales de música celta más importantes del centru del país
30 jun 2026 . Actualizado a las 11:53 h.Guieldu va ofrecer un conciertu esta fin de selmana nel festival Les Roches Celtiques, onde va formar parte de la xornada principal del certame nel entornu del castiellu de Rochetaillée, nel conceyu de Saint-Étienne. La formación va ser, amás, una de les tres propuestes programaes pa la nueche del sábadu, considerada'l platu fuerte del festival.
La presencia de Guieldu garra relevancia nun contestu nel que les músiques de raigañu asturianu tienen en Francia una visibilidá concentrada casi n’esclusiva nel Festival Intercélticu de Lorient, onde’l grupu participó l’añu pasau y espertó una bona rempuesta del públicu. Fuera d’esi gran escaparate, y sacante casos puntuales como’l de Rodrigo Cuevas, la música asturiana nel circuitu galu ye abondo llendada.
Nesti casu, el conciertu de Guieldu en Les Roches Celtiques, lleva la música celta asturiana a otru festival de renome que tien un percorríu propiu de casi trenta años, ampliando asina la presencia de la banda d’Avilés nel país vecín. Saint-Étienne ye una de les ciudaes franceses más citaes como exemplu de reconversión industrial al traviés de la cultura. Antiguu núcleu mineru, siderúrxicu y de producción militar nel centru-este del país, desenvolvió nes últimes décades un procesu de tresformación basáu na creatividá, el diseñu y la reutilización del patrimoniu industrial. Esti modelu, convertíu n’oxetu de referencia européu de rexeneración urbana, mírase dende Asturies con interés en procesos asemeyaos como’l de la antigua fábrica de La Vega n’Uviéu.
Nesti marcu, el festival Les Roches Celtiques consolidóse como una de les cites de referencia’n Francia pala música celta dende una identidá propia que xune cada añu a miles d’asistentes. Guieldu va compartir escenariu con otres propuestes internacionales de relevancia na xornada de mayor asistencia del certame, faciendo resonar la música asturiana nun circuitu onde, más allá de Bretaña, la participación de les bandes d'Asturies suel tar minorizada.
Tres la participación del grupu nel Festival Intercélticu de Lorient l’añu anterior, esti conciertu en Saint-Étienne, refuerza la proyección de Guieldu nos escenarios franceses y consolida la presencia de la música asturiana y n’asturianu n’espacios onde entá tien percorríu por desenvolver.