La Vaqueira reafita la so identidá como una de les meyores propuestes cicloturistes del norte d'España
AGORA
La Vaqueira axuntó a más de 240 participantes de 18 provincies y seis nacionalidaes, rindió homenaxe a Beatriz Tenreiro y Rocío Gamonal y consolidó un modelu de cicloturismu basáu na convivencia y el descubrimientu del occidente asturianu
01 jul 2026 . Actualizado a las 11:30 h.La Vaqueira volvió demostrar esta fin de selmana que'l cicloturismu pue entendese d'otra manera. Más de 240 ciclistes llegaos dende 18 provincies y seis nacionalidaes participaron nuna nueva edición de la marcha, que convirtió al conceyu de Valdés nun gran puntu d'alcuentru pa los qu'entienden la bicicleta como una forma de descubrir el territoriu, compartir esperiencies y esfrutar de la carretera.
Les escelentes condiciones meteorolóxiques dexaron que los participantes disfrutaren dafechu d'un percorríu que volvió poner en valor dalgunos de los paisaxes más representativos del occidente asturianu, consolidando la estrecha unión ente deporte, naturaleza y promoción del territoriu que caracteriza a La Vaqueira dende la so nacencia.
La esperiencia empezó yá na tarde del vienres cola tradicional Merienda Esguilada, celebrada na ermita de San Roque de Ballota. Los participantes xubieron hasta esti emblemáticu enclave en bicicleta pa recoyer el so dorsal y compartir los primeros momentos de convivencia enantes de la marcha, nuna propuesta que se convirtió nuna de les señes d'identidá del eventu y que dexa empezar a vivir La Vaqueira muncho primero de la salida oficial.
La salida tuvo presidida por Silvia García, conceyala de Deportes del Conceyu de Valdés, quien quixo acompañar a los participantes nel entamu d'una xornada que volvió asitiar a L.luarca como ún de los referentes del calendariu cicloturista del norte d'España.
Ún de los datos más significativos d'esta edición foi la crecedera de la participación femenina. Un total de 40 muyeres tomaron la salida, una cifra que confirma la evolución positiva de la prueba y el creciente interés que despierta ente les ciclistes, reforzando'l compromisu de La Vaqueira con un deporte cada vez más abiertu, diversu y inclusivu.
La dimensión alcanzada pol eventu quedó reflexada tamién na procedencia de los participantes. Ciclistes llegaos dende prácticamente tola xeografía del estáu compartieron carretera con aficionaos de seis nacionalidaes diferentes, consolidando l'encantu d'una marcha que sigue ampliando'l so alcance ensin perder la esencia cola que nació.
Mientres la xornada homenaxóse a Beatriz Tenreiro y Rocío Gamonal, dos referentes del deporte asturianu y del estáu, que la so reconocencia punxo en valor la so brillante trayectoria deportiva y la so contribución al desenvolvimientu y la visibilidá del ciclismu femenín. La reconocencia foi recibida con un enllargáu aplausu per parte de los participantes, nún de los intres más especiales del día.
La Vaqueira sigue apostando por un modelu diferente de marcha cicloturista, nel que'l protagonismu recai na esperiencia, la redolada y la convivencia ente participantes. Lloñe de centrase nel componente competitivu, la prueba convida a descubrir l'occidente asturianu sobre la bicicleta, fomentando un ciclismu responsable y accesible pa perfiles mui diversos.
Esi compromisu tesciende amás l'ámbitu deportivu. La Vaqueira caltién una estrecha collaboración con ASACO (Asociación d'Afectaes por Cáncer d'Ovariu), entidá cola que comparte valores como la solidaridá, la superación y el sofitu mutuu. Al traviés d'esta alianza, la prueba contribúi a dar visibilidá al cáncanu d'ovariu y a sofitar el llabor que l'asociación desenvuelve en favor de les pacientes y les sos families, destinando la totalidá de los beneficios llograos col maillot solidariu a sofitar los sos proyectos.
La esperiencia concluyó en meta con una comida concebida tamién como un homenaxe al territoriu. El menú tuvo compuestu por productos tradicionales de la gastronomía del occidente, dalgunos d'ellos en riesgu de desapaición, ellaboraos por obradores artesanos y productores locales que caltienen vives recetes y procesos d'ellaboración tresmitíos de xeneración en xeneración. La historiadora Yedra García Riesgo, especialista na cultura de los vaqueiros d'alzada, ufiertó una curtia charra divulgativa na que punxo en valor la riqueza etnográfica d'Asturies y el legáu cultural d'una de les comunidaes más representatives del occidente asturianu, reforzando'l venceyu ente la prueba y el patrimoniu que-y da nome.
La organización quier espresar un agradecimientu especial al Conceyu de Valdés, que'l so respaldu institucional resulta imprescindible pal desenvolvimientu del eventu; a Turismu del Principáu d'Asturies, pol so apueste pol deporte como ferramienta de promoción del territoriu; y a EDISA, patrocinador principal de la prueba, pol so enfotu nun proyectu que sigue creciendo añu tres d'añu. Esi agradecimientu faise estensivu al restu de patrocinadores y collaboradores, a Protección Civil, a les Fuerces y Cuerpos de Seguridá, a los servicios sanitarios, al voluntariáu y a los numberosos vecinos que, cola so implicación y hospitalidá, contribuyeron a que la xornada trescurrera con ésitu.
Con una participación récord, una organización dafechu consolidada y un ambiente que volvió ser ún de los aspectos más valoraos polos mesmos ciclistes, La Vaqueira cierra una nueva edición reafitando la so identidá como una de les propuestes cicloturistes más reconocibles del norte d'España. Un eventu que sigue creciendo ensin arrenunciar a los valores que lu convirtieron nuna esperiencia distinta: esfrutar de la bicicleta, descubrir el territoriu, caltener la cultura local y compartir una xornada inolvidable sobre dos ruedes.