L'eventu, que sigue siendo de baldre un añu más, caltién la viesca d'El Agüil como escenariu
02 jul 2026 . Actualizado a las 12:44 h.Los díes 7 y 8 d'agostu, la Viesca d'El Agüil, en Salinas (Castrillón), va convertise nuevamente nel corazón del Songs for an Ewan Day, que supo construyir una personalidá propia, alloñada de les grandes aglomeraciones y centrada en brindar una esperiencia onde cada detalle suma. Un alcuentru que caltién intacta la so esencia y que, un añu más, va ser d'accesu gratuitu gracies al compromisu de la organización por averar la música, la cultura y el bienestar a tolos públicos. Tou ello va ser posible, amás, gracies al respaldu del Conceyu de Castrillón, que'l so sofitu sigue siendo fundamental pa que Songs for an Ewan Day siga ufiertando ún de los grandes planes del branu ensin perder la so autenticidá y aquello que lo fái diferente.
La programación vuelve reflexar esa manera tan particular d'entender la música: artistes con trayectories consolidaes compartendo cartelu con nueves voces llamaes a dexar buelga. Un equilibriu que, edición tres d'edición, convirtióse nún de los sellos d'identidá del festival. Nesta edición van pasar pela viesca los más qu'imprescindibles Smile, cola so inconfundible enerxía pop; The Franklin Electric, una de les bandes internacionales más delicaes del panorama folk; Ramón Mirabet, siempre capaz de convertir cada directu nuna celebración; Mateo Eraña, ún de los nomes con mayor proyección de la nueva escena; Honahlei, col so elegante universu indie-folk; el soníu íntimu y cercanu de Grex; Mercedes Cañas, una de les cantautores más personales del momentu; De Fem, col so pop alternativu, dream pop y sicodelia suave; Gon Abril cola so sensibilidá folk y toques de rock suave y un Conciertu Vibra Mahou mui especial que se va desvelar nes próximes selmanes y que promete ser ún de los platos fuertes d'esta edición.
Un cartelu pensáu pa descubrir, emocionase y dexase sorprender y onde cada actuación va atopar na viesca un escenariu que tresforma la forma d'escuchar la música. Ente los sofitos d'esta cita imprescindible del calendariu veraniegu, atópase Caxa Rural d'Asturies, que vuelve acompañar a esti proyectu que, dende los sos entamos, demostró qu'otra manera de facer festivales ye posible.