Con una edición llimitada de 5.000 unidaes, el diseñu integra dellos de los símbolos más reconocibles d'Asturies
07 jul 2026 . Actualizado a las 17:33 h.Yera una mañana d'abril y tornaba a Asturies tres d'una intensa selmana nel estranxeru. Foi entós cuando Víctor Gabaldón, de 22 años, recibió un recordatoriu de daquién cercanu: el 12 d'agostu del 2026 había un eclís total de sol, y Asturies diba tar nun llugar privilexáu pa ver la totalidá. Mesmo que nos eclises del 2023 n'Australia y del 2024 en Norteamérica, esperábase que cientos de miles de persones allegaren a la comunidá y que se disparara la demanda de gafes afayadices pa presencia.
Sicasí, les gafes que podíen atopase nel mercáu, tanto online como en tiendes físiques, yeren toos diseños xenéricos que nun facíen xusticia nin a la magnitú del eventu nin a la cultura asturiana. La conclusión pa Víctor foi clara: había una oportunidá pa crear daqué memorable, unes gafes dafechu reconocibles, diseñaes pa la ocasión y que representaren lo meyor d'Asturies.
Foi asina como empezó una operación multidisciplinar a contrarreló, coordinando'l diseñu de les gafes, la fabricación n'esclusiva, el cumplimientu de les certificaciones y regulaciones, los cálculos y operaciones financieres, la lloxística, el desenvolvimientu de software y, a lo último, les ventes y el marketing. Ente too ello taba lo más importante pa un productu d'esti tipu: que les lentes cumpleren la norma ISO 12312-2, l'estándar internacional que garantiza una observación segura del sol.
«Dacuando pela mañana analizaba la normativa aplicable, al mediudía facía de diseñador gráficu y pela nueche de desarrollador de bases de datos de e-commerce», bromia'l mozu xixonés. «Tuvimos que diseñar la nuestra plataforma de manera desacoplada pa poder vender tanto a comercios como directamente al consumidor final, y al traviés de múltiples víes. El preciu d'esa flexibilidá foi tener que construyir el nuestru propiu backend dende cero, lo que supunxo un retu tecnolóxicu en sí mesmu».
El frutu d'esti esfuerzu ye Iberclipse (iberclipse.com), una marca de gafes d'observación solar con identidá asturiana, que produció una edición llimitada de 5.000 unidaes. El so coloríu diseñu integra de forma fluyida dalgunos de los elementos más significativos d'Asturies, como la ponte de Cangues d'Onís, el descensu del Seya, la basílica de Cuadonga o la cultura sidrera, declarada Patrimoniu Cultural Inmaterial de la Humanidá pola UNESCO nel 2024.
Con apenes trés meses pa executar el proyectu, Víctor describe lo que denomina presión astronómica: «Creo que la execución esitosa d'esti proyectu básase, sobre manera, en que nun hai posibilidá del más mínimu retrasu. Un eventu astronómicu ye daqué que nun se pue retardar nin un segundu. A cencielles nun puedes. Hai mui pocu marxe de maniobra énte cualquier pequeña demoranza, asina que te fuerza a facer les coses a tiempu y ensin escuses».
«Lo más difícil ye coordinar munches coses al empar que dependen unes d'otres: fabricación, plataforma de vienta, tresporte…». Ente les dificultaes técniques, recuerda que'l procesu d'impresión foi mui delicáu al cuntar con un diseñu tan detalláu: con tantos elementos afechos a la forma de la gafa, la precisión tenía que ser milimétrica. «Fixeron falta munchos intentos y versiones refugaes hasta dar cola alliniación y configuración d'impresión afayadices».
D'esos tropiezos, diz, salen les llecciones que de verdá importen. «Deprendes a planiar con marxe, a tener siempres un plan B y a caltener la calma cuando daqué va mal. Deprendes a trabayar con otra xente y a repartir les xeres según lo que caún fai meyor. Too esto nun lo enseñen nenyuri: depréndeslo sobre la marcha».
Ún pensaría que'l trabayu dende la idea hasta la recepción de les gafes n'almacén sería'l 80% del proyectu, pero apenes suponía'l 20%. Llegar a los tos potenciales veceros y convencer de que merquen el to productu ye realmente la parte más complicada. Ehí foi onde Víctor contactó con un equipu de marketing local, More&More Marketing, formáu por Agustina Fernández y Cristina Navareño, que destaca pola so manera creativa, disruptiva y persistente de trabayar, capaz de llegar a tolos públicos y franxes d'edá, dende particulares hasta grandes comercios y asociaciones. Esti foi claramente'l puntu d'inflexón, cuando Iberclipse dexó de ser una prueba de conceptu pa convertise en daqué más: yá yera un productu qu'involucraba a otres persones y pol que la xente se taba interesando rápido, afirma l'equipu.
Agora centren los sos esfuerzos en distribuyir les gafes per toa Asturies y en crear la meyor esperiencia posible pal día del eclís. Sobre los sos planes más inmediatos, Víctor cunta que va viaxar a Asia poco dempués pa empezar una nueva etapa académica, mientres qu'Agustina y Cristina tán trabayando nun ambiciosu proyectu pa conectar a nómades dixitales.
Cuando-yos entrugamos sobre qué supunxo'l proyectu pa ellos y qué alcordanza quieren dexar como marca, respuenden: «Esto ye dalgo mui efímero y con fecha de caducidá; el día 13 yá naide va tener nengún interés. Lo que de verdá llevamos ye la esperiencia, tolo aprendío y los bonos momentos compartíos. Eso nun caduca».
Entá asina, gústa-yos imaxinar que, quiciabes dientro d'unos años, daquién na otra punta del mundu atope una de les sos gafes escaecida no fondero d'un caxón. Y que, por un intre, recuerde aquel máxicu 12 d'agostu y lo que fai única a la nuestra tierra.