Les ayudes destínense a restaurar bienes reconocíos como BIC, trabayos de conservación, actuaciones arqueolóxicos y la meyora d'albergues del Camín de Santiago
08 jul 2026 . Actualizado a las 17:11 h.La Conseyería de Cultura, Política Llingüística y Deporte concedió ayudes destinaes a reforzar el caltenimientu, restauración, investigación y espardimientu del patrimoniu asturianu, por un importe de 680.040 euros.
La mayor aportación correspuende a la convocatoria destinada a la restauración d'elementos que formen parte del patrimoniu cultural. Esta llinia, dotada con 350.000 euros, financia actuaciones de particulares y instituciones ensin porgüeyu económicu sobre Bienes d'Interés Cultural (BIC) o bienes incluyíos individualmente nel Inventariu del Patrimoniu Cultural d'Asturies (IPCA). Trátase d'una de les llinies centrales de la política de caltenimientu patrimonial, porque dexa actuar sobre bienes protexíos que necesiten intervenciones especializaes pa garantizar la so estabilidá, recuperación y preservación al llargu plazu.
Les sovenciones concedíes tomen un ampliu conxuntu de bienes muebles y inmuebles; con actuaciones n'arquitectura relixosa, civil y tradicional, asina como n'elementos artísticos y etnográficos. Ente los proyectos sovencionaos figuren intervenciones en retablos, imáxenes, ilesies, capiyes, palacios, horros, cubiertes tradicionales, murios históricos y otros elementos singulares repartíos per distintos conceyos.
En concretu, van acometese trabayos nel retablu de la ilesia de Llorío, en Llaviana; la Colexata de Salas, la ilesia de Soutu Lluiña, el Palaciu Valdés de Xixón, el monesteriu de Valdediós, Santuyano, la ilesia de Santa María de Llugás, la capiya del Santu Cristu de Xedré, la ilesia de San Martín de Sotrondio, horros d'Ibias, cubiertes de teito en Somiedu, l'edificiu de la Colonia Escolar de Salinas y bienes patrimoniales de Cangas. Estes actuaciones van dexar recuperar valores orixinales de los bienes y favorecer el so caltenimientu y que se sumen a otros proyectos de valor, como xornaes de patrimoniu industrial, actividaes arqueolóxiques o proyectos vincultaos a la historia de la lloza de San Cloyo, ente otros.