APIAST organiza la esposición «La vida en movimientu» dientro de la primer edición de FLIPA
AGORA
La muestra va ser itinerante, pasando per Xixón, Castrillón y Mieres
15 jul 2026 . Actualizado a las 13:12 h.Nun momentu nel que la Intelixencia Artificial Xenerativa ta atacando y precarizando entá más a los oficios creativos y a la cultura, ye necesario dar visibilidá a los sos profesionales y poner en valor la importancia de los procesos artísticos. APIAST, l'Asociación de Profesionales de la Ilustración d'Asturies, dientro de la so programación FLIPA 2026 (Primer Edición de la Folixa de la Ilustración Profesional Asturiana) presenta la so esposición colectiva d'ilustración «La vida en movimientu».
La esposición, comisariada polos ilustradores y miembros de APIAST María Guija y Pedro Fano, amuesa de forma colectiva les interpretaciones sobre'l conceptu de cambéu y el movimientu constante, realizaes por 55 persones asociaes del casi centenar que formen l'asociación.
Dende les pintures paleolítiques, pasando pel arte de civilizaciones antigües, medievales y modernes, l'arte esforcióse n'amosar el movimientu inherente a toa vida. Los y les ilustradores profesionales pertenecientes a l'asociación trabayen, pa esta esposición, sobre esti conceptu. Esta ye una amuesa enllena de múltiples prismes, xenuinos y personales, tantos como caún de los autores y autores espuestos, que descifren esti conceptu dende les sos propies referencies personales pa esfrute de los sos visitantes.
L'amuesa, de calter itinerante, va permanecer en Xixón como primer allugamientu hasta'l 18 de setiembre pudiéndose visitar de llunes a vienres de 9:00h a 14:00h (horariu del COAA), y dempués va poder esfrutase en Castrillón a partir d'ochobre y en Mieres a partir del 3 d'avientu.
FLIPA 2026 ye La Folixa de la Ilustración Profesional Asturiana; la programación cultural desenvuelta mientres tol añu con charres, talleres, eventos y esposición itinerante, entamada por APIAST, l'Asociación de Profesionales de la Ilustración d'Asturies, que funciona dende 2024, ensin porgüeyu económicu, col trabayu voluntariu de les sos integrantes pola visibilidá del oficiu y la defensa de los sos intereses. APIAST forma parte de la Xunta Directiva de FADIP, la Federación d'Asociaciones d'Ilustración Profesional n'España, y ocupa'l cargu de vicepresidencia d'EIF, la Federación Europea d'Ilustración.