Benjamín Noval conquista'l Tour du Valromey y confirma que ye una de les grandes promeses del ciclismu mundial
AGORA
El ciclista de Llaviana tien ya firmáu un contratu col equipu World Tour Ineos de cara al añu 2027
20 jul 2026 . Actualizado a las 13:59 h.El ciclismu asturianu tien una nueva referencia na categoría júnior. L'asturianu Benjamín Noval proclamóse vencedor del Tour du Valromey 2026, la carrera d'etapes más prestixosa del calendariu internacional pa corredores júnior y considerada por munchos como'l Tour de Francia de la categoría. Con esti trunfu, el corredor de la MMR Academy remata una selmana escepcional nes carreteres franceses y da un nuevu pasu nuna temporada que ta siendo estraordinaria.
La victoria final de Noval nun foi frutu d'un únicu día brillante, sinón d'una actuación sólida, valiente y mui intelixente mientres les cinco etapes de la prueba. Dende l'entamu dexó clares les sos intenciones al imponese con autoridá na primer etapa, de 111 kilómetros ente Brégnier-Cordon y Artemare. El campeón d'España atacó a siete kilómetros de meta, coló en solitariu y crució la llinia de llegada con 48 segundos de ventaya sobre'l belga Vic De Smet y 53 sobre Aitor Martínez, enfundándose el maillot mariellu de líder.
Na segunda xornada defendió con ésitu'l lideralgu magar una etapa bien rápida y nerviosa, calteniéndose siempre sollerte nel grupu principal y evitando cualquier perda de tiempu. La regularidá foi una de les sos principales armes mientres tola carrera, inclusive na tercer etapa, onde una llegada complicada fíxo-y perder dellos segundos frente a les sos principales rivales, ensin abandonar nunca la llucha pola clasificación xeneral.
La cuarta etapa, marcada pola montaña volvió demostrar la calidá del ciclista asturianu. Remató cuartu na meta, mui cerca de los meyores escaladores del pelotón, y llegó a la xornada decisiva asitiáu ente los principales aspirantes al trunfu final. Anque nun vistía'l maillot mariellu, les sos diferencies colos líderes yeren perfectamente recuperables gracies a les sos escelentes condiciones como contrarrelojista.
Tou decidió na quinta y última etapa, una esixente cronoescalada hasta'l míticu Grand Colombier, una de les ascensiones más emblemátiques del ciclismu francés. Nun percorríu reserváu pa los corredores más completos, Noval volvió ufiertar una auténtica exhibición. Marcó'l segundu meyor tiempu de la etapa, suficiente pa recuperar el tiempu perdíu y facese cola victoria absoluta de la carrera, rematando una remontada que punxo de manifiestu tanto la so fortaleza física como la so capacidá pa rindir con presión.
Esti ésitu supón un nuevu finxu nuna temporada 2026 que ta siendo brillante pa Benjamín Noval. Enantes de llegar a Francia yá conquistara los Campeonatos d'España júnior de contrarreló y de fondu en carretera, amás d'axudicase la clasificación xeneral de la Vuelta al Besaya, consolidándose como'l meyor ciclista júnior español del momentu y ún de los talentos más prometedores del panorama internacional.
El Tour du Valromey tien un enorme prestixu dientro del ciclismu de formación. A lo llargo de la so historia inscribieron el so nome nel palmarés corredores que darréu se convirtieron en figures del pelotón profesional, como Mathieu van der Poel, Romain Grégoire, Victor Lafay o Emil Herzog. Ganar esta prueba supón entrar nuna llista reservada a ciclistes con un enorme potencial y confirma que Noval ta preparáu pa encarar los grandes retos internacionales que-y esperen bien llueu.
El trunfu en Francia refuerza entá más la proyección del corredor de Llaviana, que yá tien aseguráu'l so saltu al WorldTour nel 2027 tres roblar con Netcompany INEOS. Enantes d'empecipiar esa nueva etapa nel ciclismu profesional, Noval va siguir centráu nos sos próximos grandes oxetivos del añu: el Campeonatu d'Europa y el Campeonatu del Mundu júnior, onde va partir como ún de los principales favoritos dempués de la so estraordinaria exhibición nel Tour du Valromey.