Medio Rural propón la veda temporal del salmón nel 2027 pa favorecer la recuperación de la especie
AGORA
La pesca va abrise en cada cuenca namás hasta la captura del Campanu y van caltenese les estracciones autorizaes con fines de reproducción y repoblación
21 jul 2026 . Actualizado a las 12:06 h.La Conseyería de Mediu Rural y Política Agraria va proponer al Conseyu d'Ecosistemes Acuáticos y de la Pesca n'Agües Continentales la veda temporal del salmón nel 2027 pa favorecer la recuperación de la especie. El conseyeru, Marcelino Marcos, anunció güei esta midida nuna rueda de prensa.
La propuesta sofítase tanto nel principiu de precuru como na información científica y técnica disponible hasta'l momentu, qu'inclúi una amplia serie de datos sobre la evolución histórica de les poblaciones, captures, censos reproductores, densidá de xuveniles, remontes, pasos per contadores y escales y esfuerzu pesqueru.
Nesti sen, Marcos sorrayó que la situación actual del salmón nun tien qu'analizase namás dende la perspectiva de la pesca, yá que se trata d'una especie migratoria sometida a numberosos factores. La tresformación de los hábitats, les torgues nos ríos, les condiciones del agua, la supervivencia marina, los cambeos ambientales y la presión de diferentes depredadores inciden na so evolución.
«Nun tamos reaccionando a un únicu datu nin a una sola temporada. Actuamos en respuesta a un enclín históricu y primero que tolos indicadores seyan desfavorables, porque protexer una especie esixe anticipase y aplicar el principiu de precuru», señaló'l conseyeru.
Medio Rural va convocar el Conseyu d'Ecosistemes Acuáticos y de la Pesca n'Agües Continentales en cuanto disponga de los censos de setiembre y del análisis técnicu completu, previsiblemente ente finales de setiembre y principios d'ochobre. Nesa xunta analizará la propuesta colos representantes del sector, enantes d'aprobar la normativa correspondiente a 2027.
«Nun queremos ríos ensin salmones, pero tampoco ríos ensin pescadores. Por eso combinamos una veda temporal con más sofitu económicu, más repoblación, más siguimientu científicu y una xestión activa de tolos factores qu'afecten a la especie», esplicó Marcos.
La propuesta pa 2027 va establecer como regla xeneral la prohibición de la pesca ordinaria del salmón. Va tener calter temporal y la so continuidá o cambéu va evaluase añalmente, en función de la evolución de los indicadores científicos. La regulación va contemplar una escepción pa caltener la tradición del Campanu: la pesca va abrise en cada cuenca puramente hasta la captura del primer salmón. A partir d'esi momentu, va quedar cerrada nesa cuenca mientres el restu de la temporada. Esta fórmula va dexar caltener les puyes y celebraciones vinculaes al Campanu per aciu una captura única y controlada.
Tamién se van caltener les captures autorizaes d'exemplares vivos destinaes a proyectos de reproducción y repoblación, como ARCA, impulsáu pola Sociedá de Pescadores Les Mestes del Narcea. Estes actuaciones van realizase baxo control técnicu y per aciu protocolos específicos. Los pexes nun se van estrayer pa consumu, sinón que se van emplegar como reproductores pa llograr alevinos y reforzar les poblaciones de la so propia cuenca.