Arcu de Cine arranca güei con dos estrenos mundiales y una selección de destacaos curtiumetraxes asturianos y nacionales
AGORA
La selección d'obres, con especial focu nel audiovisual asturianu, va proyectase hasta'l 30 de xunetu
28 jul 2026 . Actualizado a las 12:50 h.Arcu de Cine empieza güei la so tercer edición na Escuela de Comerciu, dientro de la programación del Festival Arcu Atlánticu con una selección de trabayos que pon el focu na creación audiovisual asturiana y axunta tamién dalgunos de los curtiumetraxes más reconocíos del panorama nacional. El ciclu va desenvolvese hasta'l xueves 30 de xunetu y va cuntar con dos estrenos mundiales.
La programación ábrese con Palacios del pueblo, de Manuel García Postigo, que va ufiertar un percorríu pela historia del barriu xixonés d'El Coto al traviés de la tresformación del antiguu Cuartel de Zapadores. El documental repasa la evolución d'esti espaciu dende la so construcción en 1900 hasta la so reconversión en Centru Municipal Integráu en 1998.
El segundu estrenu mundial va ser Voces fantasma, del realizador asturianu José F. Riveiro. El documental afronta la salú mental dende una perspectiva personal y parte de la mesma esperiencia del cineasta pa reflexonar sobre la infancia, el dolor y la busca d'una verdá capaz de sanar.
Arcu de Cine inclúi amás una selección de trabayos reconocíos nos principales certames nacionales. Ente ellos atópase Montecarlo 67, de Rubén Guindo, rodada nes cais de Xixón y ganadora d'ocho Premios Fugaz. La película recrea l'alcuentru ente Chicho Ibáñez Serrador, Pilar Miró y un mozu Steven Spielberg mientres el Festival de Montecarlo de 1967.
El programa incorpora tamién Cara de Cona, de Guillermo de Oliveira, ganadora d'un Premiu Fugaz y del Roel de Plata en Medina del Campo, y Gilbert, d'Alex Salu, Arturo Lacal y Jordi Jiménez, reconocida col Goya 2026 al Meyor Curtiumetraxe d'Animación.
La cultura sidrera asturiana va tener coles mesmes un espaciu destacáu nesta edición, coincidendo cola so recién reconocencia per parte de la UNESCO como Patrimoniu Cultural Inmaterial de la Humanidá. El ciclu va proyectar La gran manzana, de David de la Cruz, que percuerre un sieglu d'historia d'una familia llagarera y conecta la tradición sidrera asturiana con Nueva York, y Pumar, de Ricardo Alonso, un documental de calter etnográficu sobre los pumares, la ellaboración de la sidra y la fiesta popular.
La programación complétase coles propuestes gallegues, cántabres y vasques María Rita, de Juan Barbazán; El adiós, de Lucía Sánchez; As Maos da Pulpeira, de Silvia Cachafeiro, y El Mismo, de Virginia Curia.
Arcu de Cine va zarrar la so tercer edición el xueves 30 de xunetu cola proyección especial de Xy9, llargumetraxe asturianu dirixíu por David Huergo.