Asturies Antitaurina y CSI EMTUSA denuncien l'usu de marquesines pa promocionar la tauromaquia en Xixón
AGORA
Dende Asturies Antitaurina denuncien la hipocresía del Conseyu d'Alministración d'EMTUSA. Nel 2019 censuró una campaña publicitaria antitaurina nos autobuses públicos por ser mui «esplícita» al amosar diferentes momentos d'una corrida de toros col argumentu de que podría mancar la sensibilidá de los que la vieren
13 ago 2026 . Actualizado a las 11:20 h.L'asociación Asturies Antitaurina y el sindicatu CSI d'EMTUSA denuncien l'usu de marquesines y espacios urbanos de la ciudá pa espublizar la Feria Taurina de Begoña. Medea López, presidenta de l'asociación, señala que la campaña publicitaria d'esti añu, amás de ser de mui mal gustu, nun caló ente la ciudadanía asturiana. «La mayoría de nós nun identificamos colos valores del toréu porque'l toréu nun tien valores. Torturar a un animal hasta la muerte nun ye motivu d'arguyu nin d'almiración sinón del más absolutu despreciu y tamos cansaes de qu'añu tres añu s'utilice a una empresa pública de Xixón pa promocionar la tauromaquia».
«Mesmo que yá fixeron compañeros de la tranvía de Bilbao, dende'l sindicatu CSI esiximos a EMTUSA que retire cualquier publicidá rellacionada con espectáculos taurinos. El tresporte públicu ye un serviciu esencial d'usu colectivu y financiáu en gran midida con fondos públicos, polo que tien qu'evitar convertise en plataforma pa mensaxes que normalicen la crueldá», afirma'l voceru de CSI, Juan Manuel Martínez Morala.
«Somos conscientes de qu'EMTUSA va intentar echar balones fuera y responsabilizar a la empresa que xestiona la publicidá (JCDecaux) pero nun puede negalo, porque yá lo fixo en dos causes, que n'últimu términu ye decisión suya censurar la publicidá de los autobuses, mupis y marquesines. Nel 2023 retiró la campaña “Nos gustan maduritas. ¿Y a ti?”», qu'espublizaba una hamburguesería de Xixón. Y nel 2019, vetó la campaña antitaurina de l'asociación ANADEL col argumentu de que les imáxenes yeren mui esplícites y podíen mancar la sensibilidá de los que la vieren. Eses imáxenes amosaben a un toru amorrentando, con sangre real y a poques de que-y claven una puntilla, ye lo qu'ocurre a diariu en cada corrida de toros d'España. ¿Censuren la publicidá d'una imáxenes taurines pola so dureza y sicasí, promocionen la tauromaquia? Ye, cuantimenos, hipócrita y tendencioso”, esplica López.
El códigu d'EMTUSA nun acepta campañes que seyan susceptibles de xenerar discutiniu. «Suponemos qu'al conceyal de Foro, Pelayo Barcia, que ye quien preside'l Conseyu d'Alministración d'EMTUSA, nun-y paez polémico espublizar un cartelu taurín, magar de que'l 77% de la población española cada vez tenemos más empatía colos animales y refugamos la tauromaquia. Una vegada más, el gobiernu de Xixón antepón los intereses del lobby taurín a los de cualquier otru», señalen dende Asturies Antitaurina.