Derechos Sociales somete a información pública l'anteproyectu de Llei del Voluntariáu
AGORA
La futura norma va actualizar el marcu xurídicu del sector, con midíes pa reforzar la participación ciudadana, protexer a la infancia y sofitar a les entidaes
19 ago 2026 . Actualizado a las 16:32 h.La Conseyería de Derechos Sociales y Bienestar sacó güei a información pública l'anteproyectu de Llei del Voluntariáu d'Asturies, una norma que va sustituyir a la vixente dende 2001 p'adaptar l'acción voluntaria a la nueva realidá social, tecnolóxica y demográfica y reforzar la participación solidaria de la ciudadanía.
La futura llei tien como oxetivu modernizar el marcu xurídicu del voluntariáu n'Asturies, allinialu cola llexislación estatal y ufiertar mayores garantíes tanto a les persones voluntaries como a les entidaes y a los que reciben el so sofitu.
Ente les sos principales novedaes figuren la reconocencia del voluntariáu dixital o virtual, la creación de la tarxeta de la persona voluntaria y el refuerzu de la protección de la infancia y l'adolescencia. Nesti ámbitu, pa participar en programes qu'impliquen contactu habitual con menores va ser obligatoriu acreditar per aciu certificación oficial la inesistencia d'antecedentes por delitos sexuales y trata de seres humanos. Amás, la norma regula la participación de menores n'actividaes de voluntariáu en función de la so edá, madurez y desenvolvimientu personal.
El testu tamién reconoz per primer vegada'l valor de les práctiques tradicionales d'ayuda mutua que formen parte de la cultura comunitaria asturiana y define con mayor claridá los derechos y deberes de les persones voluntaries, les entidaes y les persones destinatarias de l'acción voluntaria. Coles mesmes, regula l'alcuerdu d'incorporación, el documentu que formaliza la relación ente la persona voluntaria y la entidá.
Col fin de fortalecer el texíu asociativu, la llei reconoz el papel estratéxicu de los centros de voluntariáu y participación social, especialmente nel mediu rural, y garantiza la sostenibilidá d'esta rede como serviciu esencial pa la vertebración territorial, el desenvolvimientu comunitariu y la llucha contra la despoblación.
La norma incorpora, amás, midíes pa fomentar la participación ciudadana. Ente elles destaca la prescripción social del voluntariáu, que va dexar encamentar la incorporación a actividaes voluntaries dende los ámbitos sanitariu y social como ferramienta pa combatir la soledá ensin deseyar, fortalecer les relaciones comunitaries y promover el bienestar.
Otra de les novedaes ye la creación de la tarxeta de la persona voluntaria, que va sirvir pa identificar y reconocer l'actividá desenvuelta polos que participen en programes de voluntariáu y va facilitar l'accesu a incentivos vinculaos al tresporte públicu, la cultura, el deporte y otres actividaes.
En materia d'organización y gobernanza, la futura llei prevé la ellaboración d'un plan estratéxicu del voluntariáu con calter cuatrienal y la creación de dos nuevos preseos de sofitu al sector: l'Observatoriu del Voluntariáu, empobináu al análisis y evaluación de l'acción voluntaria n'Asturies, y l'Escuela de Voluntariáu, destinada a la formación y capacitación de persones voluntaries y profesionales.
L'anteproyectu va permanecer n'información pública mientres diez díes hábiles, plazu mientres el que van poder presentase alegaciones al traviés del portal Asturies Participa.