La asociación considera «secundariu» el númberu d´exemplares que se van abatir y reclama actuaciones recurrentes nes zones con daños
24 ago 2026 . Actualizado a las 18:21 h.Asturies Ganadera calificó esti llunes de «secundariu» el númberu de llobos que’l Gobiernu del Principáu autorizará a abatir —67 exemplares— y reclamó mecanismos de control que garanticen la compatibilidá ente la conservación de la especie y l’actividá ganadera. La sobreprotección del llobu, según denunció l’asociación nuna rueda de prensa, provocó la práctica desapaición del ganáu menor, consideráu clave na ecoloxía de los montes asturianos pol so llabor esbrozador.
Asturies Ganadera reclamó que les actuaciones de control «se produzan de forma inmediata» tres los ataques nes zones con muertes recurrentes de ganáu, yá qu'esa rapidez permite a los llobos asociar el castigu col ataque previu y reduz la probabilidá de que vuelvan a repetilu. Amás, considera que les actuaciones tienen que ser recurrentes hasta consiguir que, en cada área, los daños seyan asumibles polos ganaderos llocales.
Según esplicó, nes zones onde los llobos namás dispongan de ganáu p'alimentase, «siguirán atacando a pesar de los controles». Poro, considera importante declarar zones llibres de llobu, como El Cuera, El Sueve o’l Monte Llosorio, ente otres. Al so xuiciu, nestes actuaciones tienen que participar actores llocales, ganaderos y cazadores, y tienen que cuntar coles garantíes del Gobiernu asturianu pa protexer a quienes participen nes batíes de posibles denuncies, de manera que seya la propia Administración la responsable.