El FICX inclúi nomes consagraos del cine internacional como los de Clio Barnard, Angela Schanelec, Hong Sangsoo o João Nicolau nel so primer avance

Mientres sigue'l procesu de selección de les obres que van formar parte del so 64ª edición, el Festival Internacional de Cine de Xixón (FICX), que se va celebrar del 13 al 21 de payares del 2026, presenta una primer avance de la so programación. Nueve llargometraxes yá confirmaos pa les competiciones internacionales Albar, Retueyos y FICX Premiere, toos ellos d'estrenu absolutu n'España, conformen esti adelantu de la Sección Oficial. A ellos súmense dos focos dedicaos a l'animación contemporánea: ún centráu nes cineastes portugueses Alexandra Ramires y Laura Gonçalves y otru na directora, animadora y ilustradora Elena Walf.

Hong Sangsoo va tornar a Albar con Nowhere to Lay My Eyes (Nun Dul Dega Eomne, Corea del Sur, 2026). Ganador en Xixón del Premiu al Meyor Llargometraxe en trés ocasiones, por Right Now, Wrong Then (2015), Hotel by the River (2018) y By the Stream (2024), Hong sumó a la so multipremiada trayectoria dos nuevos galardones llograos va unos díes nel festival suizu de Locarno: Meyor Dirección y Meyor Interpretación pa Kim Minhee. L'actriz encarna a Sanghee, una muyer que realiza pequeñes películes esperimentales y viaxa col so hermanu a Jeju pa realcontrase, dempués de diez años, con so madre. Comíes, paseos y conversaciones familiares sirven al director pa reflexonar sobre'l cine, l'ésitu, l'arrepentimientu y la soledá.

La Competición Internacional Albar va cuntar coles mesmes col nuevu llargumetraxe de Clio Barnard, I See Buildings Fall Like Lightning (Reinu Uníu, 2026), estrenáu mundialmente na Quincena de Cineastes del Festival de Cannes, onde llogró'l Premiu del Públicu. Autora de The Arbor, The Selfish Giant —Premiu Europa Cinemas Label en Cannes— y Ali & Ava, Barnard adapta equí la novela homónima de Keiran Goddard con guion de Enda Walsh. La película sigue a cinco amigos que crecieron xuntos en Birmingham mientres la baltadera de los grandes complexos de vivienda social tresformaba'l paisaxe de la so infancia. Música, fiestes y pubs como espacios de pertenencia, y una repartida qu'inclúi a Joe Cole (Peaky Blinders), Anthony Boyle (Tolkien, Tetris) y Jay Licurgo (Peaky Blinders, Last Swim).

Tamién va competir en Albar My Wife Cries (Meine Frau weint) (Alemaña, Francia, 2026), nuevu trabayu de Angela Schanelec, figura fundamental de la Escuela de Berlín qu'estrenó dos títulos n'Un Certain Regard de Cannes, Plätze in Städten y Marseille, y recibió l'Osu de Plata a la Meyor Dirección por I Was at Home, But... y l'Osu de Plata al Meyor Guion por Music. Presentada anguaño na Competición Oficial de la Berlinale y darréu ganadora del Premiu al Meyor Llargometraxe en IndieLisboa, la película supón amás el regresu al FICX d'una cineasta que visitó Xixón nel 2010 col ciclu dedicáu precisamente a la Berliner Schule. En My Wife Cries Thomas, operador de grúa, recibe una llamada de la so esposa Carla dempués d'un accidente nel que morrió'l so compañeru de baille; a partir d'esa confesión, Schanelec esplora les relaciones ente dos persones que paecen dexar de compartir un mesmu llinguaxe.

Esti primer avance representa namás una pequeña amuesa de la programación de la 64ª edición. El FICX sigue col visionáu y selección d'obres y caltién entá abiertos los plazos d'inscripción pa bona parte de les sos secciones. Los llargometraxes van poder inscribise hasta'l 6 de setiembre del 2026. Pa los curtiometraxes, el plazu regular va permanecer abiertu tamién hasta'l 6 de setiembre, con un períodu ampliáu hasta'l 13 de setiembre. Queda salvada Asturies Curtiumetraxes, que los sos plazos y procedimientu d'inscripción van ser publicaos darréu na web del festival, www.ficx.tv.

---

---