Mieres acueye'l próximu miércoles 2 de setiembre una sesión participativa del proyectu «Documenta Asturies»
AGORA
Trátase d'una cita abierta a tola ciudadanía que quier poner de mancomún la conocencia llocal y comunitaria sobre la historia, les tradiciones y el patrimoniu del territoriu p'arriquecer la información sobre la nuestra comunidá nes redolaes dixitales abiertes
26 ago 2026 . Actualizado a las 12:09 h.El Salón de Plenos del Conceyu de Mieres va acoyer el próximu miércoles 2 de setiembre una sesión participativa perteneciente a Documenta Asturies, un proyectu impulsáu por Llaboral Centru d'Arte y Creación Industrial y Wikiesfera que busca ameyorar la presencia del patrimoniu asturianu en Wikimedia (principalmente Wikipedia, Wikidata y Wikimedia Commons). Esta iniciativa parte de la constatación de qu'una parte significativa del patrimoniu cultural, social y hestóricu asturianu tien una presencia llimitada nes redolaes dixitales abiertes. Énte esta situación, esti proyectu plantega trabayar dende'l mesmu territoriu pa incorporar la conocencia local y comunitaria a plataformes d'accesu llibre y abiertu.
La sesión va desenvolvese en día 2 de setiembre, a partir de les 18.15 hores, nel Salón de Plenos del Conceyu y l'accesu ye llibre a tola ciudadanía que conoza o viva nel territoriu y quiera compartir les sos conocencies sobre Asturies. Nun ye necesario tener conocencies técniques nin utilizar ordenador mientres la sesión, yá que l'oxetivu d'esti alcuentru ye identificar de forma colectiva aquelles temes, persones, llugares, tradiciones o iniciatives que merecen tar meyor representaos en Wikipedia y los proyectos Wikimedia.
Nesti sentíu, Documenta Asturies busca fortalecer capacidaes locales y facilitar ferramientes pa qu'asociaciones, colectivos y persones participantes puedan intervenir de forma autónoma en procesos de documentación, preservación y espardimientu del patrimoniu cultural n'abiertu. La sesión en Mieres va combinar, poro, la presentación del proyectu, la identificación colectiva de conteníos relevantes del territoriu, l'análisis de necesidaes de documentación y l'introducción a los criterios d'edición en Wikipedia y otros proyectos Wikimedia.
Dende la conceyalía de Participación Ciudadana que dirixe Marta Jiménez anímase a la ciudadanía a sumase a esta cita y poner de mancomún les conocencies colectives sobre Asturies, y tamién sobre Mieres p'arriquecer esti interesante proyectu. «La participación ciudadana ye fundamental en tolos ámbitos y, nesti casu tamién, yá que falamos de promocionar y poner en valor lo más el nuestru al traviés de la memoria común y vivencies, poniéndolos a disposición de toos y toes al traviés de plataformes qu'ayuden a que nun se pierda toa esa cultura y conocencia».