El documentu inclúi actividaes culturales y educatives, proyectos d'investigación y espositivos, programes públicos y la participación conxunta en convocatories y redes
27 ago 2026 . Actualizado a las 17:15 h.La conseyera de Cultura, Política Llingüística y Deporte, Vanessa Gutiérrez, presidió la mañana del 27 d'agostu en L'Entregu la robla del protocolu de collaboración ente'l Muséu de la Minería y de la Industria d'Asturies (MUMI) y Llaboral Centru d'Arte y Creación Industrial. El documentu establez un nuevu marcu de trabayu conxuntu que va dexar desenvolver proyectos y compartir conocimientos y esperiencies ente dambos equipamientos.
La conseyera punxo en valor la importancia d'esti alcuerdu en compañía de les directores del MUMI, Cristina Cantero, y de Llaboral, Semíramis González. El protocolu establez les bases pa trabayar de manera conxunta n'ámbitos como la ciencia, la industria, la minería, la tecnoloxía, la creación contemporánea y la mediación cultural. Amás, esta collaboración inclúi l'intercambiu de bones práctiques y la organización conxunta d'actividaes.
L'alcuerdu estipula un marcu nuevu pa una conexón enre Llaboral y la minería que yá vien de llargo, con proyectos como'l de l'artista residente María Alcaide o producciones como La mina y el so soníu o Aprendimos de les cuenques. El documentu garra esti testigu y contempla tamién el desenvolvimientu de proyectos espositivos, programes públicos y iniciatives de mediación cultural, asina como la posibilidá de collaborar en convocatories, programes y redes d'ámbitu autonómicu, nacional ya internacional. La vixencia inicial del protocolu ye de trés años y va poder prorrogase d'alcuerdu mutuu ente les partes.
La robla d'esti documentu consolida asina la collaboración ente dos de los equipamientos culturales de referencia nel territoriu y abre'l calce pa una nueva etapa de trabayu compartíu que valga p'afondar na rellación ente la creación artística, la ciencia y el patrimoniu industrial d'Asturies.